نیوزی لینڈ کے اسٹار آل راؤنڈر مائیکل بریسول ایڑھی کی انجری کی وجہ سے آئی سی سی مینز کرکٹ ورلڈکپ سے باہر ہوگئے ہیں۔

نیوزی لینڈ کرکٹ کے مطابق بریسول ایڑھی کی انجری کے باعث 6 سے 8 مہینوں کے لیے کرکٹ کے میدان سے باہر ہوگئے ہیں، وہ ٹی ٹوئنٹی بلاسٹ میں وورسٹرشائر کی طرف سے بیٹنگ کرتے ہوئے انجرڈ ہوئے تھے۔

مائیکل بریسول نیوزی لینڈ کے ون ڈے پلیئر آف دی ایئر ہیں، ان کی جمعرات کو انگلینڈ میں سرجری ہوگی جس کے بعد آل راؤنڈرکا طویل ری ہیب شروع ہوگا۔

ری ہیب طویل ہونے کے باعث بریسول اکتوبر، نومبر میں ہونے والے دنیائے کرکٹ کے سب سے بڑے ایونٹ ورلڈ کپ سے باہر ہوگئے ہیں۔

 نیوزی لینڈ کرکٹ ٹیم کے کوچ کا کہنا ہے کہ بریسول کا انجرڈ ہونا ہماری ٹیم کے کے لیے ایک بہت بڑا دھچکا ہے کیونکہ کپتان کین ولیمسن کی پہلے ہی ورلڈ کپ میں شرکت مشکوک ہے۔

کین ولیمسن انڈین پریمیئر لیگ (آئی پی ایل) میں کھیلتے ہوئے انجرڈ ہوئے تھے اوراب وہ گھٹنے کی سرجری کے بعد ری ہیب کے عمل سے گزر رہے ہیں ان کو مکمل صحت یاب ہونے میں ابھی مزید وقت لگے گا۔

واضح رہے کہ آئی سی سی مینز کرکٹ ورلڈ کپ کا 13واں ایڈیشن اکتوبر اور نومبر میں کھیلا جائے گا، ایونٹ کے میچز بھارت میں ہوں گے جس کا شیڈول آنے والے کچھ دنوں میں جاری کردیا جائے گا۔

میڈیا رپورٹس کے مطابق بھارتی کرکٹ بورڈ (بی سی سی آئی) نے ورلڈکپ کا شیڈول آئی سی سی کو بھجوادیا ہے تاہم اب حتمی اعلان انٹرنیشنل کرکٹ کونسل کی جانب سے ہی کیا جائے گا۔