قومی ٹیم کو جولائی میں ٹیسٹ سیریز کے لئے سری لنکا کا دورہ کرنا ہے، رپورٹس
٠٢ جون ٢٠٢٣
ذرائع کا بتانا ہے کہ یہ ٹیسٹ سیریز جولائی میں ہوگی اور سری لنکا کرکٹ بورڈ اس حوالے سے جلد شیڈول کا اعلان کرے گا جبکہ قومی کرکٹ ٹیم کے دورہ سری لنکا میں ون ڈے میچز کو شامل کرنے کے معاملے پر ابھی تک کوئی پیشرفت نہیں ہوسکی ہے۔
میڈیا رپورٹس کے مطابق سری لنکا اور پاکستان کرکٹ بورڈز کے درمیان ٹیسٹ سیریز میں ون ڈے میچز کو شامل کرنے سے متعلق بات چیت آگے نہیں بڑھ سکی۔
رپورٹس میں کہا گیا ہے کہ سری لنکا نے بھارت میں شیڈول ورلڈکپ کے پیش نظر پاکستان کے ساتھ ون ڈے سیریز کھیلنے کی تجویز دی تھی تاہم دونوں بورڈز کو درپیش ناگزیر وجوہات کی بنیاد پر وائٹ بال سیریز کو ڈراپ کیا گیا ہے۔
پاکستان اور سری لنکا کے درمیان سیریز صرف ٹیسٹ میچز پر ہی مشتمل رہے گی جن میں سے 2 ٹیسٹ میچز آئی سی سی ٹیسٹ چیمپیئن شپ کا حصہ ہیں۔
