چیمپئنز ٹرافی کا ا نعقاد 19 فروری سے 9 مارچ 2025 تک پاکستان میں ہونا ہے۔
١٣ جون ٢٠٢٤
امریکا میں پاکستان اور بھارتی کرکٹ کے حکام کے درمیان ہونے والی ملاقات میں چیمپئنز ٹرافی کے حوالے سے بھی بات ہوئی ہے، بی سی سی آئی نے ہمیشہ کی طرح گیند اپنی حکومت کے کورٹ میں ڈال دی، البتہ پی سی بی بلو شرٹس کے پاکستان آنے کے لیے پُرعزم بھی ہے اور پُرامید بھی۔
تفصیلات کے مطابق پاکستان طویل عرصے بعد آئندہ برس چیمپئنز ٹرافی کی صورت میں کسی آئی سی سی ایونٹ کی میزبانی کرے گا، بھارت نے اپنی ٹیم کو سرحد پار نہ بھیجنے کی پالیسی اپنائی ہوئی ہے،اسی وجہ سے پی سی بی کو گزشتہ برس ایشیا کپ ہائبرڈ ماڈل کے تحت کروانا پڑا تھا، جس میں بھارتی ٹیم نے اپنے میچز سری لنکا میں کھیلے، چیمپئنز ٹرافی مجوزہ طور پر 19 فروری سے 9 مارچ کے دوران ہونی ہے جس کا مجوزہ شیڈول پی سی بی نے آئی سی سی کو بھجوادیا ہے۔
ایسے عالم میں ہائبرڈ ماڈل اپنانا ممکن نہیں لگتا، پی سی بی ایونٹ کو یو اے ای یا کسی اور ملک منتقل کرنے پر بھی آمادہ نہیں ہے، حکام کو مکمل امید ہے کہ بھارتی ٹیم ٹورنامنٹ میں شرکت کے لیے لاہور آئے گی، ذرائع نے بتایا کہ گذشتہ دنوں نیویارک میں پاکستان اور بھارتی کرکٹ بورڈ کے اعلیٰ حکام کی ملاقات میں چیمپئنز ٹرافی کے انعقادپر بھی تبادلہ خیال کیا گیا،البتہ بھارت نے ہمیشہ کی طرح اپنا قدیم موقف اپناتے ہوئے کہا کہ فیصلہ حکومت کرے گی۔
نمائندہ ایکسپریس نیوز کی جانب سے رابطہ کرنے پر ایک پی سی بی آفیشل نے ملاقات کی تصدیق کرتے ہوئے کہا کہ ہمیں امید ہے کہ ایونٹ مکمل طور پر ہمارے ملک میں ہی ہوگا، اسی لیے اسٹیڈیمز کی اپ گریڈیشن پر بھاری رقم خرچ کی جا رہی ہے،یاد رہے کہ قذافی اسٹیڈیم لاہور میں تعمیراتی کام تیزی سے جاری ہے،کراچی اور راولپنڈی میں بھی اسٹیڈیمز کی تزئین و آرائش کی جائے گی، اس حوالے سے دسمبر کے آخر تک کی ڈیڈ لائن رکھی گئی ہے، یہی تینوں وینیوز میگا ایونٹ کے میزبان ہوں گے۔
.jpg)
