انگلینڈ کے خلاف تیسرے ٹی 20کے لئے پاکستان کی ممکنہ پلیئنگ الیون

پاکستان اور انگلینڈ کے درمیان تیسراٹی 20 میچ منگل کےروز صوفیہ گارڈنز، کارڈف میں کھیلا جائے گا۔ انگلینڈ نے چار میچوں کی سیریز میں 1-0 کی برتری حاصل کر رکھی ہے، جبکہ لیڈز میں شیڈول پہلا میچ بارش کی نذر ہوگیا تھا۔ 
تفصیلات کے مطابق پاکستانی ٹیم شاید صائم ایوب کے ساتھ صبر کا دامن ہاتھ سے کھوچکی ہے اور ان کی جگہ عثمان خان کو موقع دیا جائے گا، جو ملتان سلطانز کے اپنے ساتھی کھلاڑی محمد رضوان کے ساتھ اننگز کا آغاز کریں گے، جبکہ کپتان بابر اعظم نمبر تین پر بیٹنگ کے لیے آئیں گے۔ 
مڈل آرڈر میں طاقتور ہٹرز شامل ہیں جیسے فخر زمان، اعظم خان جو وکٹ کیپنگ بھی کریں گے، افتخار احمد اور آل راؤنڈر عماد وسیم، جو ٹیم کو رنز بنانے اور جب ضرورت ہو تو اننگز کو تیز کرنے کے لئے ایک مضبوط بنیاد فراہم کرتے ہیں۔ 
پاکستان ممکنہ طور پر چار فاسٹ بولرز کے ساتھ میدان میں جائے گا، جن کی قیادت شاہین آفریدی کریں گے اور حارث رؤف، نسیم شاہ اور محمد عامر ان کا ساتھ دیں گے۔ 
شاداب خان نے پہلے ٹی 20 میچ میں چار اوورز میں 55 رنز دیئے تھے اور کوئی وکٹ نہیں لی تھی، جو ان کی بدترین ٹی 20 بولنگ پرفارمنس تھی۔ امکان ہے کہ ان کی جگہ نسیم شاہ کو پلیئنگ اسکواڈ میں شامل کیا جائے۔ 
ٹیم مینجمنٹ کی حکمت عملی میں تبدیلیاں موجودہ بادل چھائے ہوئے موسم اور متوقع بارش کے امکانات سے بھی متاثر ہیں۔ 
پاکستان کی ممکنہ پلیئنگ الیون: 
عثمان خان، محمد رضوان، بابر اعظم (کپتان)، فخر زمان، اعظم خان (وکٹ کیپر)، افتخار احمد، عماد وسیم، شاہین آفریدی، نسیم شاہ، حارث رؤف، محمد عامر۔