ایشیاءکپ: پاکستانی فاسٹ بولرز نے نئی تاریخ رقم کردی

قومی ٹیم کے مایہ ناز بولرز شاہین شاہ آفریدی، نسیم شاہ اور حارث رئوف پالے کیلے میں ہونے والے پاک بھارت میچ میں بھارتی کھلاڑیوں کی تمام 10 وکٹیں لے اڑے۔   
تفصیلات کے مطابق ایشیاءکپ میں بھارت کے خلاف پاکستانی فاسٹ بولرز نے نئی تاریخ رقم کردی۔ 
گزشتہ روز روایتی حریف پاکستان اور بھارت کے درمیان پالے کیلے میں کھیلا گیا میچ بارش کی نذر ہوگیا تاہم دونوں ٹیموں کو ایک ایک پوائنٹ دے دیا گیا۔ 
ٹورنامنٹ کے اس میچ کی خاص بات یہ تھی کہ پاکستان کی جانب سے تینوں فاسٹ بولرز نے میچ میں بھارت کی 10 وکٹیں حاصل کیں، جو ایشیاءکپ کی تاریخ میں ایک ریکارڈ ہے۔ 
بھارت نے میچ میں ٹاس جیت کر پہلے بیٹنگ کرنے کا فیصلہ کیا تاہم شاہین شاہ آفریدی اور حارث رؤف نے بھارتی ٹاپ آرڈر کو ریت کی دیوار بنادیا۔ اوپنر روہت شرما 11، ویرات کوہلی صرف 4، شبھمن گِل 10 اور شیریاس آئیر کو شاہین اور حارث نے ابتداء ہی میں پویلین کی راہ دکھائی اور ہندوستانی بیٹنگ لائن کی کمر توڑ کر رکھ دی۔ 
میچ میں شاہین شاہ آفریدی نے 4 جبکہ حارث اور نسیم شاہ نے 3، 3 شکار کیے۔ 
ایشیاءکپ میں تینوں پاکستانی فاسٹ بولرز نے بھارتی ٹیم کی تمام 10 وکٹیں لے کر تیز گیند بازوں کا پہلا لاجواب مجموعہ بن کر تاریخ رقم کی۔