پاکستان رواں برس ٹی10 لیگ کے انعقاد کا خواہش مند

پاکستان رواں برس ہی ٹی 10 کرکٹ لیگ کے انعقاد کا خواہش مند ہے البتہ کرکٹرز کا بے حد مصروف شیڈول لیگ کے انعقادمیں چیلنج بنے گا۔ 
60 بالز پر مشتمل ٹی 10کرکٹ کی پہلی لیگ دسمبر2017میں یو اے ای میں منعقد ہوئی تھی، بعد میں ویسٹ انڈیز اور سری لنکن کرکٹ بورڈز نے بھی اس میں دلچسپی دکھائی، گذشتہ دنوں زمبابوے کرکٹ نے مختصر طرز کے میچز پر مشتمل ایونٹ کا انعقاد کیا تھا، اب پاکستان بھی ٹی 10لیگ کرانے کے لیے کوشاں ہے۔ 
پی سی بی مینجمنٹ کمیٹی کے سربراہ ذکا اشرف اس کااعلان بھی کر چکے ہیں، اس حوالے سے رابطہ کرنے پر ایک بورڈ آفیشل نے کہا کہ کھیل میں اب جدت آتی جا رہی ہے،ہمیں وقت کے ساتھ چلنا ہوگا،ٹی ٹین لیگ آئندہ چند برسوں میں مزید مقبولیت حاصل کر سکتی ہے، اس لیے ہم چاہتے ہیں کہ اس طرز کے ایونٹ کا انعقاد کریں۔ 
انھوں نے کہا کہ پی ایس ایل اب دنیا بھر میں نمایاں مقام رکھتی ہے، اب پی سی بی، ٹی ٹین لیگ شروع کرنا چاہتا ہے، ذکا اشرف کی خواہش ہے کہ جلد ہی لیگ کا انعقاد کر لیا جائے، اگر سب کچھ پلان کے مطابق ہوا تو رواں برس ہی پہلا ایڈیشن منعقد کر لیں گے، البتہ کھلاڑیوں کے مصروف شیڈول سے کوئی ونڈو نکالنا بھی بڑا چیلنج ثابت ہوگا،اس لیگ کے لیے الگ فرنچائزز فروخت کی جائیں گی۔ 
ان کا کہنا تھا کہ بورڈ سے کئی افراد نے رابطہ بھی کیا ہے کہ جب کبھی کوئی ایسا ایونٹ شروع کریں تو ہمیں ضرور بتائیں، کچھ عرصے بعد ایک تقریب میں ٹی10 لیگ کی تفصیلات کا اعلان اورلوگو کا بھی اجرا  کر دیا جائے گا،حکام کی کوشش ہوگی کہ فرنچائز خریدنے والوں کو ویمن ٹیمیں بنانے پر بھی قائل کیا جائے۔