قومی ٹیم نے جنوبی افریقہ کی ویمن ٹیم کو تیسرے ون ڈے میں ہرادیا

قومی ویمنز ٹیم نے تیسرے ون ڈے میں بالآخر کامیابی حاصل کرلی، تاہم سیریز1-2 سے جنوبی افریقہ کی ویمن ٹیم کے نام رہی۔ 
پاکستانی ویمن کرکٹ ٹیم نے جنوبی افریقہ کی ویمن کرکٹ ٹیم کے خلاف تیسرا ون ڈے میچ 8 وکٹوں سے جیت لیا، سیریز دو ایک سے جنوبی افریقہ کے نام ہوگئی۔ 
پاکستانی ویمن کرکٹ ٹیم نے جنوبی افریقہ کو ون ڈے سیریز کے تیسرے میچ میں شکست دے کر پروٹیز کا کلین سوئپ کرنے کا خواب پورا نہ ہونے دیا۔ ہدف کے تعاقب میں سدرہ امین نے 68 اور بسمہ معروف نے 60 رنزکی نمایاں اننگزکھیلیں۔ 
پاکستان نے 38 ویں اوور میں دو وکٹوں کے نقصان پر ہدف پورا کرلیا۔ میچ جیتنے کے بعد آئی سی سی چیمپئن شپ ٹیبل پر پاکستان ویمنز ٹیم 12 پوائنٹس کےساتھ دوسری پوزیشن پر آگئی ہے۔ 
کراچی میں ہونے والے ون ڈے سیریز کے تیسرے میچ میں مہمان ٹیم 185 رنز بنا کر آل آؤٹ ہوگئی تھی۔ پاکستان کو سیریز میں کلین سوئپ شکست سے بچنے کے لیے میچ جیتنا لازمی تھا کیونکہ ابتدائی دو میچ جنوبی افریقہ کی ٹیم جیت چکی تھی۔ 
پروٹیز کی جانب سے ناڈائن ڈی کلرک نے عمدہ اننگز کھیلتے ہوئے 60 رنز بنائے جب کہ ٹیزمن برٹس نے 32 رنز بنائے۔ 
سعدیہ اقبال، نشرہ سندھو اور ندا ڈار نے2،2 کھلاڑیوں کو پویلین کی راد دکھائی۔ ڈائنا بیگ، وحیدہ اختر اور عالیہ ریاض کے حصے میں ایک ایک وکٹ آئی۔ 
اس سے قبل جنوبی افریقہ کی ویمن کرکٹ ٹیم نے دوسرے ون ڈے میں بھی پاکستان کو شکست دیتے ہوئے سیریز میں 0-2 کی فیصلہ کن برتری حاصل کرلی تھی۔