پاکستان ویمن ٹیم نے جنوبی افریقہ کے خلاف ٹی ٹوئنٹی سیریز جیت لی

پاکستان نے جنوبی افریقہ کے خلاف ٹی ٹوئنٹی ویمن انٹرنیشنل سیریز جیت لی۔ 
ایکسپریس نیوز کے مطابق پاکستان کے دورے پر پہلی مرتبہ آنے والی جنوبی افریقہ کی ویمن کرکٹ ٹیم کے خلاف  قومی ویمن ٹیم نے سیریز  میں 0-2 کی برتری کے ساتھ یقینی فتح اپنے نام کرلی۔ سیریز کا تیسرا اور آخری میچ پیر کے روز کھیلا جائے گا۔ 
نیشنل اسٹیڈیم کراچی میں فلڈ لائٹ میں کھیلے جانے والے میچ میں پہلے کھیلنے کی دعوت پر جنوبی افریقہ کی ٹیم نے مقررہ 20 اوورز میں 3 وکٹوں کے نقصان پر پاکستان کو 151 رنز کا ہدف دیا۔ 
ٹیزمین  برٹس نے 46 ، کپتان لورا نے 41  اور کلارک نے 21رنز بنائے، کیپ نے 26 رنز کا اضافہ کیا،  سدرا اقبال  اور نشرح سندھو نے ایک ایک وکٹ  حاصل کی، جواب میں پاکستان نے دوسرے میچ میں دلچسپ انداز میں 151 رنز کا ہدف  3 وکٹیں کھو کر 19.1 اوورز میں حاصل کرلیا اور سیریز جیت لی۔ 
سدرا امین نے دوسرے میچ میں بھی عمدہ بیٹنگ کرتے ہوئے 44 گیندوں پر 6 چوکوں اور ایک چھکے کی مدد سے 61 رنز بنائے، بسمہ معروف نے 27 رنز بنائے جبکہ  شوال ذوالفقارصرف4 رنز بناسکیں۔ 
عالیہ ریاض 18 گیندوں پر 2 چوکوں اور اتنے ہی چھکوں کی مدد سے 31 رنزکے ساتھ ناقابل شکست رہیں جبکہ منیبہ علی نے آوٹ ہوئے بغیر 15 گیندوں پر 26 رنز بنائے جن میں دو چوکے اور ایک چھکا شامل تھا، جنوبی افریقہ کی بولر ملابا نے دو اورڈیلمی ٹکر نے ایک وکٹ لی۔