فلسطینیوں سےاظہارِیکجہتی! وزیراعظم نے بھی عثمان خواجہ کی حمایت کردی  

اسرائیلی جارحیت کے خلاف غزہ کے مظلوم شہریوں اور دیگر فلسطینیوں کی حمایت میں عثمان خواجہ کے ردعمل پر آسٹریلوی وزیراعظم نے بھی کرکٹر کی حمایت کردی۔ 
پاکستان کیخلاف تین میچوں کی سیریز کے پہلے میچ سے قبل پریکٹس سیشن کے دوران آسٹریلوی اوپنر عثمان خواجہ نے فلسطینیوں کے حق میں آواز بلند کرنے والے جوتے پہن کر ٹریننگ کی تھی، جس میں فلسطینی عوام سے ہمدردی اور اظہارِ یکجہتی کے نعرے درج تھے۔ 
عثمان خواجہ کے فلسطینیوں سے اظہار یکجہتی کرتے ہوئے جوتوں پر لکھا ہوا تھا کہ آزادی سب کا حق ہے اور تمام زندگیاں برابر ہیں۔،،
جس پر آئی سی سی نے موقف اپنایا تھا کہ کرکٹر کو میچ کے دوران مبینہ سیاسی پیغام والے جوتے پہننے کی اجازت نہیں دی جائے گی۔
بعدازاں عثمان خواجہ نے سیاہ پٹی باندھ کر میچ کھیلا تھا اور غزہ میں نہتے فلسطینیوں کے قتل عامِ پر اپنا پیغام دنیا تک پہنچایا تھا تاہم آئی سی سی نے اس پر بھی کرکٹر کیخلاف جرمانہ عائد کردیا تھا۔ 
دوسری جانب سڈنی ٹیسٹ میچ کے آغاز سے قبل آسٹریلو وزیراعظم اینتھونی البانی نے دونوں ٹیموں کے اعزاز میں عشائیہ رکھا تھا، اس موقع پر انہوں نے عثمان خواجہ کو سراہتے ہوئے کہا کہ میں (خواجہ) کو اس جرات کے لئے مبارکباد دینا چاہوں گا جس نے انسانی اقدار کے لیے کھڑے ہوکر دکھایا، اس نے ہمت کا مظاہرہ کیا ہے اور یہ حقیقت ہے کہ ٹیم نے اس کی حمایت کی۔،، 
آسٹریلوی وزیراعظم کے الفاظ نے جہاں عثمان خواجہ کو راحت فراہم کی ہے وہیں ان کی درخواست پر کرکٹ آسٹریلیا کی اہم میٹنگ کے بعد انھیں رواں سیزن میں بگ بیش میچ کے دوران بیٹ پر امن کی فاختہ کی تصویر لگانے کی اجازت بھی دی۔