ایشیاءکپ:سری لنکا نے بنگلہ دیش کو یکطرفہ مقابلےکے بعد شکست دے دی

ایشیاءکپ کے دوسرے میچ میں سری لنکا نے بنگلہ دیش کو 5 وکٹوں سے شکست دے دی۔ 
پالے کیلے میں کھیلے گئے میچ میں بنگلہ دیشی ٹیم پہلے بیٹنگ کرتے ہوئے 42.4 اوورز میں محض 164 رنز بناکر آل آؤٹ ہوگئی، ہدف کے تعاقب میں سری لنکا نے عمدہ بیٹنگ کرتے ہوئے 165 رنز 39 اوورز میں 5 وکٹوں کے نقصان پر بنالیے۔ سری لنکا کی جانب سے سدیرا سماراویکراما 54 اور چارتھ اسالنکا 62 رنز کے ساتھ نمایاں رہے۔ 
بنگلہ دیش کی طرف سے شکیب الحسن نے 2، تسکین احمد، شروف الاسلام اور مہدی حسن نے ایک ایک کھلاڑی کو آؤٹ کیا۔
قبل ازیں بنگلہ دیش نے ٹاس جیت کر پہلے بیٹنگ کا فیصلہ کیا اور پوری ٹیم 42.4 اوورز میں 164 رنز بنا کرپویلین لوٹ گئی، بنگال ٹائیگرز کی جانب سے نجم الحسین 89 رنز کے ساتھ نمایاں رہے تاہم ان کے علاوہ کوئی بھی کھلاڑی قابل ذکر رنز بنانے میں ناکام رہا۔ اوپنر تنزید حسن صفر، محمد نعیم 16، توحید ہردوئے 20 اور کپتان شکیب الحسن محض 5 رنز بناکر پویلین لوٹے۔ مشفق الرحیم 13، مہدی حسن 5 اور مہدی حسن (ٹو) 6 رنز کے مہمان ثابت ہوئے۔ تسکین احمد اور مستفیظ الرحمٰن کھاتہ کھولے بغیر ہی چلتے بنے۔ 
سری لنکا کی جانب سے متھیشا پاتھیرانا نے 4 اور مہیش تھیکشانا نے 2 کھلاڑیوں کو آؤٹ کیا۔ دھننجایا ڈی سلوا، دونیتھ والالیگا اور داسن شناکا نے ایک ایک وکٹ حاصل کی۔

بنگلہ دیش کا اسکواڈ: 
شکیب الحسن (کپتان)، محمد نعیم، تنزید حسن، نجم الحسن شانتو، توحید ہردوئے، مشفق الرحیم، مہدی حسن، مہدی حسن میراز، تسکین احمد، شرف الاسلام اور مستفیض الرحمان شامل ہیں۔

سری لنکا کا اسکواڈ:
داسن شناکا (کپتان)، ایس ایل: پاتھم نسانکا، دیموتھ کرونارتنے، کوسل مینڈس، سدیرا سماراویکراما، چارتھ اسالنکا، دھننجایا ڈی سلوا، دونتھ ویلالج، مہیش تھیکشانا، کسن راجیتھا اور متھیشا پاتھیرانا۔