پی سی بی نے ڈومیسٹک کرکٹرز کی تنخواہوں میں حیران کن اضافہ کردیا  

پاکستان کرکٹ بورڈ (پی سی بی) نے ڈومیسٹک کرکٹرز کی تنخواہوں میں حیران کن اضافہ کردیا۔ ڈومیسٹک کھلاڑیوں کے معاوضے اور میچ فیس بھی بڑھا دی گئی۔ 
تفصیلات کے مطابق گزشتہ روز لاہور میں پریس کانفرنس کے چیئرمین پی سی بی محسن نقوی نے ڈومیسٹک سطح پر 3 نئے چیمپئینز ٹورنامنٹ منعقد کروانے کا اعلان کیا، جس کے ساتھ ہی ڈومیسٹک کھلاڑیوں کے معاوضوں اور میچ فیس میں بھی اضافہ کردیاگیاہے۔ 
ان ٹورنامنٹس میں سینٹرل کنٹریکٹ رکھنے والے کھلاڑیوں کے علاوہ گزشتہ 3 برس سے مختلف ایونٹس میں پرفارم کرنے والے 150 کرکٹرز بھی ایونٹ میں حصہ لے سکیں گے۔ پاکستان کرکٹ بورڈ نے اِن کھلاڑیوں کی تنخواہوں میں بھی خاطر خواہ اضافہ کردیا ہے۔ 
کیٹیگری اے کے 40 ڈومیسٹک کرکٹرز کو اب ماہانہ 5 لاکھ 50 ہزار روپے دیئے جائیں گے۔ 
کیٹیگری بی کے 50 کھلاڑیوں کو ماہانہ 4 لاکھ روپے ملیں گے۔ 
کیٹیگری سی کے 60 کھلاڑیوں کو ماہانہ 2 لاکھ 50 ہزار دیے جائیں گے۔ 
سال 2023-24 سیزن کے دوران اِن ڈومیسٹک کرکٹرز کو تنخواہوں کی مد میں محض 50 ہزار سے 3 لاکھ روپے کیٹیگری کے حساب سے دیے جاتے تھے۔ 
اسی طرح بورڈ کے کھلاڑیوں کی میچ فیس میں بھی اضافہ کیا ہے، ریڈ بال کیلئے 2 لاکھ، 50 اوور فارمیٹ کیلئے 1 لاکھ 25 ہزار جبکہ ٹی20 کیلئے 1 لاکھ روپے دیے جائیں گے۔ 
گزشتہ سیزن کے مقابلے میچ فیس میں بھی نمایاں اضافہ ہوا ہے، اس سے قبل ریڈ بال کیلئے 80 ہزار اور وائٹ بال کرکٹ کیلئے 40 ہزار روپے دیئے جاتے تھے۔