چین میں ہونے والے ایشین گیمز کے کرکٹ ایونٹ میں پاکستان شاہینز کی قیادت قاسم اکرم کریں گے،پی سی بی
٢٥ اگست ٢٠٢٣
پاکستان کرکٹ بورڈ ( پی سی بی ) نے چین کے شہر ہینگ ژو میں ہونے والی ایشین گیمز کے کرکٹ ایونٹ کے لیے پاکستان شاہینزکے15 رکنی اسکواڈ کا اعلان کردیا جس کی قیادت قاسم اکرم کریں گے۔
چین میں ہونے والے 19 ویں ایشین گیمز میں کرکٹ مقابلے 28 ستمبر سے7 اکتوبر تک ہینگ ژو میں ہوں گے، یہ کرکٹ ایونٹ ٹی 20 فارمیٹ کے تحت کھیلا جائے گا۔
ایونٹ کے لیے بنائے گئے قومی اسکواڈ، پاکستان شاہینز میں قاسم اکرم کو کپتان جبکہ عمیر بن یوسف کو نائب کپتان مقرر کیا گیا ہے، اس کے علاوہ دیگر کھلاڑیوں میں عامر جمال، عرفات منہاس، ارشد اقبال، آصف علی، حیدرعلی، خوشدل شاہ، مرزا طاہر بیگ، محمد حسنین، محمد اخلاق، روحیل نذیر، شاہنواز دھانی، سفیان مقیم اور عثمان قادر شامل ہیں۔
ایشین گیمز کے قواعد و ضوابط کے مطابق پاکستان شاہینز کوارٹر فائنل سے اپنی مہم کا آغاز کریں گے، کوارٹر فائنل 3 اور 4 اکتوبر کو کھیلے جائیں گے جبکہ ایونٹ کے سیمی فائنلز 6 اکتوبر کو ہوں گے اور فائنل 7 اکتوبر کو کھیلا جائے گا۔
.jpg)
