ایشین گیمزکے لئے پاکستانی ویمن ٹیم کا اعلان، بسمہ معروف اسکواڈمیں شامل نہیں

پی سی بی نے ایشین گیمز کے لیے پاکستان ویمن کرکٹ ٹیم کا اعلان کر دیا جب کہ اسکواڈ میں بسمہ معروف کو شامل نہیں کیا گیا۔ 
ایشین گیمز سے قبل پاکستان ویمن ٹیم جنوبی افریقہ کے خلاف 1 سے 14 ستمبر تک سیریز کھیلے گی۔ 
لیفٹ آرم اسپنر انوشہ ناصر اور دائیں ہاتھ کی بلے بازشوال ذوالفقار کو پہلی بار ایشین گیمز کے لیے ٹیم میں شامل کیا گیا ہے جب کہ ڈیانا بیگ کی ٹیم میں واپسی ہوئی ہے۔ 
گرین شرٹس کے اسکواڈ میں کپتان ندا ڈار، عالیہ ریاض، انوشے ناصر، ڈیانا بیگ، فاطمہ ثناء، منیبہ علی، ناجیہ علوی، نشرہ سندھو، نتالیہ پرویز، عمیمہ سہیل، صدف شمس، شوال ذوالفقار، سدرہ امین، عروب شاہ اور ام ہانی شامل ہیں۔ 
پاکستان کرکٹ بورڈ (پی سی بی) کا کہنا ہے کہ بسمہ معروف کو ایشین گیمز کے قواعد کے تحت اپنے بچوں کو کھلاڑیوں کے ساتھ رکھنے کی اجازت نہ ہونے کی وجہ سے اسکواڈ میں شامل نہیں کیا گیا۔ 
پی سی بی نے کہا ہے کہ عائشہ نسیم کے ریٹائرمنٹ کے فیصلے کو منظور کرلیا گیا ہے۔

کپتان ندا ڈار کا بیان:

پاکستانی ٹیم کی کپتان ندا ڈار کا کہنا ہے کہ ایشین گیمز میں پاکستانی ویمز کرکٹ نے متعدد یادگار لمحات دیکھ رکھے ہیں اور انہیں اس تاریخ کا حصہ ہونے کا اعزاز حاصل رہا ہے، اب کپتان کی حیثیت سے انہیں اپنی تجربہ کار اور نوجوان کرکٹرز کی صلاحیتوں پر مکمل بھروسہ ہے، ہم مل کر ان یادگار لمحات میں مزید اضافہ کریں گے اور تیسری مرتبہ گولڈ میڈل جیتنے کی کوشش کریں گے۔ 
ندا ڈار کا کہنا تھا کہ یقینی طور پر ایونٹ میں مقابلہ سخت ہوگالیکن انہیں کھلاڑیوں کی مہارت اور ٹیم اسپرٹ پر مکمل یقین ہے۔ 
ندا ڈار نے اس بات پر افسوس کا اظہار کیا کہ بسمہ معروف ٹیم کے ساتھ نہیں ہوں گی، انہیں اندازہ ہے کہ بسمہ کے لیے پاکستان کی نمائندگی کیا معنی رکھتی ہے۔ 
واضح رہے کہ پاکستان کی ویمنز ٹیم 2010  میں چین میں ہونے والے ایشین گیمز اور پھر2014 میں جنوبی کوریا میں ہونے والے ایشین گیمز کے کرکٹ مقابلوں میں گولڈ میڈل جیت چکی ہے اور اس کی نظریں اب ہیٹ ٹرک مکمل کرنے پر مرکوز ہیں۔ 
پاکستانی ویمن کرکٹ ٹیم آئی سی سی کی عالمی رینکنگ اور ٹورنامنٹ کے قواعدوضوابط کے مطابق ٹورنامنٹ کا آغاز کوارٹرفائنل سے کرے گی جو 22سے 24ستمبر تک منعقد ہوں گے۔ یہ میچز ٹی ٹوئنٹی فارمیٹ کے تحت کھیلے جائیں گے۔
سیمی فائنلز25 ستمبر کو کھیلے جائیں گے جبکہ فائنل 26 ستمبر کو ہوگا۔ 
کانسی کے تمغے کے لیے میچ بھی 26ستمبر کو کھیلا جائے گا۔