یقین ہو گیا ہے کہ ٹیم میں بڑی سرجری کی ضرورت ہے، محسن نقوی  

پی سی بی کے چیئرمین محسن نقوی  نے ٹی 20 ورلڈ کپ 2024 کے اہم معرکے میں بھارت کے ہاتھوں شکست کے بعد ٹیم میں بڑی تبدیلیوں کا عندیہ دے دیا۔ ان کا کہنا تھا کہ ابتدائی طور پر، مجھے یقین تھا کہ ایک معمولی سرجری کافی ہوگی، لیکن اس خراب کارکردگی کے بعد، یہ واضح ہوگیا ہے کہ ایک بڑی اوور ہالنگ کی ضرورت ہے۔ قوم جلد ہی ٹیم میں کئی بڑی تبدیلیوں کو دیکھے گی۔ محسن نقوی نے مزید کہا کہ بھارت کے ہاتھوں شکست ہر پہلو سے مایوس کن تھی۔  
نیویارک میں میچ کے بعد صحافیوں سے گفتگو کرتے ہوئے محسن نقوی کا کہنا تھا مجھے شروع میں لگتا تھا کہ کرکٹ ٹیم کا چھوٹی سرجری سے کام چل جائے گا لیکن بھارت  کے خلاف  انتہائی خراب کارکردگی کے بعد یقین ہوگیا ہے کہ ٹیم میں بڑی سرجری کی ضرورت ہے۔،، 
انہوں نے کہا کہ پاکستانی کرکٹ اس وقت اپنی سب سے کم درجہ کی پر فارمنس پر ہے۔ ہمارا سب سے بڑا چیلنج ٹیم کی کارکردگی کو بہتر بنانا ہے۔ 
محسن نقوی نے عندیہ دیا کہ قوم قومی کرکٹ ٹیم میں جلد بڑی سرجری ہوتی دیکھے گی، ہم نے چیمپئنز ٹرافی کے لئے ٹیم تیار کرنی ہے اور وقت آگیاہے کہ باہر بیٹھے نئے ٹیلنٹ کو بھی موقع دیا جائے۔ 
پی سی بی کے چیئرمین محسن نقوی کا مزید کہنا تھا کہ پاکستانی کرکٹ ٹیم کو دنیا کی ایک بہترین ٹیم بنانا ہے مجھے اچھی طرح معلوم ہے کہ ٹیم میں کیا چل رہا تھا اور ہارنے کی وجوہات کیا ہیں۔،، 
پی سی بی سربراہ کے مطابق قوم کرکٹ ٹیم سے ایسی مایوس کن کارکردگی کی توقع نہیں رکھتی، ہمیں بہتر کارکردگی دکھانی ہے۔