پی سی بی نے نئے بورڈ آف گورنرز کا اعلان کردیا  

تفصیلات کے مطابق پاکستان کرکٹ بورڈ (پی سی بی) نے نئے بورڈ آف گورنرز کا اعلان کردیا ہے جبکہ نجم سیٹھی کا بنایا ہوا پی سی بی بورڈ آف گورنرز کالعدم قرار دے دیا گیا، الیکشن کمشنر احمد شہزاد فاروق رانا نے نئی باڈی کا اعلان کردیا، چیئرمین پی سی بی کا انتخاب 28 جون کو ہوگا جبکہ حکمرانی کا تاج وزیر اعظم اور پیٹرن کے نامزد ذکا اشرف کا منتظر ہے۔ سربراہ مینیجمنٹ کمیٹی نجم سیٹھی پہلے ہی پی سی بی کی سربراہی کی دوڑ سے باہر ہوچکے ہیں۔

وزرات برائے بین الصوبائی رابطہ امورکی جانب سے 20 جون کو جاری کئے گئے نوٹیفکیشن میں پی سی بی کی مینجمنٹ کمیٹی تحلیل کردی گئی تھی مگر اسی روز کمیٹی کے سربراہ نجم سیٹھی نے بورڈ آف گورنرز کا اعلان کیاتھا، الیکشن کمشنر اور قائم مقام چیئرمین احمد شہزاد فاروق رانا نے ارکان کی تقرریاں کالعدم قرار دیتے ہوئے نیا بورڈ آف گورنرز تشکیل دے دیا۔

وزیر اعظم اور پیٹرن انچیف کے نامزد 2ارکان ذکا اشرف اور مصطفی رمدے، 4ریجنز نیشنل بینک، اسٹیٹ بینک، سوئی ناردرن گیس پائپ لائن لمیٹڈ، سوئی سدرن گیس کمپنی، 4ریجنز لاڑکانہ، ڈیرہ مراد جمالی، بہاولپور اور حیدرآباد کو نمائندگی دی گئی ہے۔

 چیئرمین پی سی بی کا انتخاب 28جون کو پی سی بی ہیڈ کوارٹرز لاہور میں ہوگا، انتخابی شیڈول اداروں سے نامزدگیاں وصولی ہونے کے بعد جاری کیا جائے گا، ذکاءاشرف کو بورڈ کی کمان سپرد کرنے کی تیاریاں مکمل کر لی گئی ہیں۔