سرفراز نواز کی روکی گئی پنشن بحال کردی گئی، پی سی بی

چیئرمین پی سی بی مینجمنٹ کمیٹی ذکا اشرف کا کہنا ہے کہ انہیں سرفراز نواز جیسے کرکٹر کو اس حالت میں دیکھ کر افسوس ہوا اور وہ پریشان ہوئے کہ ان جیسے کرکٹر کو پنشن جیسے حق سے محروم رکھا گیا۔ 
سرفراز نواز کی جانب سے پلیئرز ویلفیئر پالیسی کے ضابطہ اخلاق کی خلاف ورزی کے باعث ڈسپلنری کارروائی کے تحت ان کی پنشن روک دی گئی تھی۔ 
پاکستان کرکٹ بورڈ کے مطابق منیجمنٹ کمیٹی کے سربراہ ذکا اشرف کی سابق ٹیسٹ کرکٹر سرفراز نواز سے ملاقات ہوئی ہے جس کا مقصد 2017 سے رکی ان کی ادائیگیوں کے معاملے کو حل کرنا تھا۔ 
منیجمنٹ کمیٹی کے سربراہ ذکا اشرف نے اس موقع پر پاکستان کرکٹ بورڈ کی کرکٹرز ویلفیئر پالیسی کے تحت سرفراز نواز کی تمام رکی ہوئی ادائیگیوں کا چیک ان کے حوالے کیا۔ 
پاکستان کرکٹ بورڈ کے مطابق یہ وہ ادائیگیاں تھیں جو سرفراز نواز کی جانب سے پلیئرز ویلفیئر پالیسی کے ضابطہ اخلاق کی خلاف ورزی کے باعث ڈسپلنری کارروائی کے تحت روک دی گئی تھیں۔ 
پی سی بی کے بیان کے مطابق سرفراز نواز نے چونکہ اب پاکستان کرکٹ بورڈ کو یقین دلایا ہے کہ وہ ضابطہ اخلاق پر عمل کریں گے لہذا پلیئرز ویلفیئر پالیسی کے تحت وہ ادائگیاں بحال کر دی گئی ہیں۔
سرفراز نواز 55 ٹیسٹ اور 45 ون ڈے انٹرنیشنل میچوں میں پاکستان کی نمائندگی کر چکے ہیں۔ انہوں نے اس دوران ٹیسٹ کرکٹ میں 177 اور ون ڈے میں 63 وکٹیں حاصل کیں۔