پی سی بی کا ٹاپ کرکٹ کنٹریز کے ڈومیسٹک کرکٹ ماڈلز کا جائزہ

پی سی بی نے ملک میں ڈومیسٹک کرکٹ کو مضبوط بنانےکے لئے اہم فیصلے کرنے کا عندیہ دے دیا، پاکستان میں کوچنگ کے معیار کو بہتر بنانے کے لیے ایک "ماسٹر" کوچ بھی مقرر کیا جائے گا۔ چیرمین پی سی بی نے ملک میں ڈومیسٹک کرکٹ کو فروغ دینے کے پلان کی اصولی منظوری دے دی۔
تفصیلات کے مطابق پاکستان کرکٹ بورڈ (پی سی بی) نے ملک میں ڈومیسٹک کرکٹ کو مضبوط بنانے کا فیصلہ کیا ہے۔ چیئرمین پی سی بی محسن نقوی کی زیر صدارت نیشنل کرکٹ اکیڈمی کے بورڈ روم میں 3 گھنٹے طویل اجلاس ہوا، اجلاس میں ڈومیسٹک کرکٹ نظام کو مضبوط بنانے کا فیصلہ کیا گیا اور چئیرمین پی سی بی  نےکوالٹی ڈومیسٹک کرکٹ کو فروغ دینے کے پلان کی اصولی منظوری بھی دی۔ پی سی بی نے ٹاپ کرکٹ کنٹریز کے ڈومیسٹک کرکٹ ماڈلز کا جائزہ لیا، اجلاس میں کوالٹی ڈومیسٹک کرکٹ کے فروغ کے لیے سفارشات اور تجاویز پر غور کیا گیا اور فیصلہ کیا گیا کہ کھلاڑیوں کو قومی ٹیم میں شمولیت کے لیے ڈومیسٹک کرکٹ کھیلنی ہوگی جبکہ ڈومیسٹک کنٹریکٹ پر نظر ثانی کا فیصلہ بھی کیا گیا۔  
چیئرمین پی سی بی کی زیر صدارت  اجلاس میں ڈومیسٹک کرکٹ کے لیے کوچنگ کا معیار بہتر بنانے کا فیصلہ بھی کیا گیا اور بتایا گیا کہ اس ضمن میں ڈومیسٹک کرکٹ کے کوچز کی ٹریننگ کے لیے ایک ماسٹر کوچ کو بھی تعینات کیا جائے گا۔ 
چیئرمین پی سی بی نے کہا کہ کوالٹی ڈومیسٹک کرکٹ کو ہر سطح پر پرموٹ کیا جائے گا اور کلب لیول سے نیشنل لیول تک تسلسل کے ساتھ ٹورنامنٹس کا انعقاد کرایا جائے گا۔ 
محسن نقوی کا کہنا تھا کہ بہترین کوچز نئےٹیلنٹ کی ٹریننگ کرکے ان کی صلاحیتوں میں نکھارلائیں گے، کارکردگی، فٹنس اور میرٹ پر کھلاڑیوں کا انتخاب کیا جائے گا اور اس پر کوئی سمجھوتہ نہیں ہوگا۔،، 
ان کا مزید کہنا تھا کہ نئے ٹیلنٹ کو سامنے لانے کے لیے ہنگامی بنیادوں پر کام کرنا ہوگا، نئے ٹیلنٹ پر سرمایہ کاری سے کرکٹ کو گراس روٹ لیول پر فروغ ملے گا اور کوالٹی ڈومیسٹک کرکٹ کے فروغ سے انٹرنیشنل کرکٹ سے گیپ کو کم کرنے میں مدد ملے گی۔،، 
اجلاس میں  بھارت، آسٹریلیا، انگلینڈ اور نیوزی لینڈ کے ڈومیسٹک کرکٹ کے ڈھانچے کے خدوخال کا بھی جائزہ لیا گیا اور چئیرمین پی سی بی کی ہدایت پر کوالٹی ڈومیسٹک کرکٹ کے فروغ کے لیے تینوں فارمیٹس کے ٹورنامنٹس کرانے کا فیصلہ بھی کیا گیا۔