پاکستانی کرکٹ میں یویوٹیسٹ کی واپسی، فیل ہونیوالے کھلاڑی باہرہوجائیں گے

پاکستان کرکٹ بورڈ (پی سی بی) نے ملک بھر میں کھلاڑیوں کی فٹنس کو بہتر بنانے کے لیے یو یو ٹیسٹ واپس لانے کا فیصلہ کیا ہے۔ پی سی بی کا کہنا ہے کہ قومی ٹیم کے ٹیسٹ کرکٹرز اور انٹرنیشنل کرکٹرز کو یویو ٹیسٹ سمیت تمام فٹنس ٹیسٹ لازمی پاس کرنے ہوں گے۔ 
تفصیلات کے مطابق ماضی میں یو یو ٹیسٹ نہیں لیا جا رہا تھا لیکن اب ڈائریکٹر ڈومیسٹک کرکٹ خرم نیازی نے کھلاڑیوں کی فٹنس بہتر بنانے کے پلان کی منظوری دے دی ہے۔ پلان کے مطابق یہ فٹنس ٹیسٹ دو مرحلوں میں کرائے جائیں گے۔ پہلے مرحلے میں 11 جولائی سے ملک بھر میں فٹنس ٹیسٹ لیے جائیں گے۔ فٹنس ٹیسٹ سب سے پہلے ضلعی سطح پر کرائے جائیں گے، اس کے بعد علاقائی سطح پر ہوں گے۔ پی سی بی کے چیئرمین محسن نقوی نے بھی فٹنس پلان کی منظوری دے دی ہے۔ فٹنس ٹیسٹ میں ناکام ہونے والے کھلاڑیوں کو نہ صرف قومی ٹیم بلکہ علاقائی ٹیموں سے بھی ڈراپ کردیا جائے گا۔ 
خرم نیازی نے علاقائی معاہدوں اور ٹیم کے انتخاب کو فٹنس ٹیسٹ پاس کرنے سے مشروط کیا ہے۔ ٹیسٹ کرکٹرز، بین الاقوامی کرکٹرز اور قومی کرکٹرز کو یو یو ٹیسٹ سمیت تمام فٹنس ٹیسٹ پاس کرنا ہوں گےاس کے بعد ہی انہیں ملک کی نمائندگی کے قابل سمجھا جائے گا۔
یاد رہے کہ پاکستان ٹیم کے سابق ڈائریکٹر محمد حفیظ نے انکشاف کیا تھا کہ سابقہ ​​انتظامیہ جس میں مکی آرتھر اور گرانٹ بریڈ برن شامل تھے نے فٹنس ٹیسٹ کو خارج کرنے کا فیصلہ کیا تھا۔
کلب پریری فائر پوڈ کاسٹ پر گفتگو کرتے ہوئے محمد حفیظ نے ٹیم کے ٹرینر کے ساتھ بات چیت کا ذکر کیا جہاں وہ فٹنس معیارات کے حوالے سے پچھلی ​​انتظامیہ کی ہدایات پر ٹرینر کی جانب سے آنکھیں بند کرنے کے عمل سے مایوس ہوئے تھے۔