نامناسب رویہ: شاہین آفریدی کے خلاف سخت ایکشن لیے جانے کا امکان  

فاسٹ بولر شاہین شاہ آفریدی کے نامناسب رویے پر کوچز اور بورڈ حکام سخت خفا ہیں جس کی بنا پر شاہین آفریدی کے خلاف سخت ایکشن ہونے کا امکان ہے۔ اس فیصلے کا ایک مقصد بنگلہ دیش کے خلاف ہوم سیریز میں ڈومیسٹک پرفارمرز کو مزید مواقع فراہم کرنا بھی ہے۔ 
ذرائع کے مطابق اگلے ماہ سے شروع ہونے والی بنگلہ دیش کے خلاف ہوم ٹیسٹ سیریز کےلئے بھی فاسٹ بولر کو زیر غور نہیں لایا جائے گا۔ شاہین کے ساتھ دو سے تین دیگر سینئرز کرکٹرز کو بھی ریسٹ دیا جاسکتا ہے۔ 
کوچز اور سلیکٹرز کمیٹی کے درمیان ابتدائی میٹنگ میں دورہ انگلینڈ اور آئی سی سی ٹی ٹوئنٹی ورلڈ کپ میں خراب رویے کا مظاہرہ کرنے والے کرکٹرز کو لگام دینے پر تبادلہ خیال ہوا ہے۔ 
اطلاعات کے مطابق شاہین آفریدی نے دورہ انگلینڈ میں کوچ اور سلیکٹر محمد یوسف کے ساتھ بدتمیزی کی تھی۔ محمد یوسف نشاندہی کررہے تھے کہ آپ بار بار نوبال کررہے ہیں۔ اس مداخلت کا شاہین شاہ آفریدی نے برا منایا تھا اور ان سے کہا تھا کہ بار بار مت ٹوکیں، مجھے پریکٹس کرنے دیں۔،،
بعد ازاں شاہین آفریدی نے اپنے رویے پر معذرت بھی کرلی تھی۔ 
کوچز نے اپنی رپورٹ میں ورلڈکپ کے دوران بھی شاہین کے رویے کی شکایت کی۔ شاہین شاہ آفریدی کے ساتھ مزید دو سے تین کھلاڑیوں کے خلاف شکنجہ سخت کرنے پر بھی مشاورت کی گئی ہے۔  
بنگلہ دیش کے خلاف ہوم سیریز میں ڈومیسٹک کے پرفارمرز کو زیادہ مواقع دینے پر بھی اتفاق کیا گیا ہے اور دو ٹیسٹ میچز پر مشتمل سیریز کی تیاری کے لیے تربیتی کیمپ راولپنڈی میں لگانے کا فیصلہ کیا گیا ہے۔  
سلیکشن کمیٹی کے ارکان چالیس سے زیادہ کھلاڑیوں کا ایک پول آف پلیئرز بنانے پر غور کررہے ہیں جس میں ان کھلاڑیوں کو ترجیح دی جائے گی جن کی پرفارمنس کے ساتھ فٹنس بھی انٹرنیشنل معیار کی ہوگی۔ 
کوچز نے اپنی رپورٹ میں اس بات کا بطور خاص ذکر کیا ہے کہ پاکستان کھلاڑیوں کی فٹنس انٹرنیشنل معیار کی نہیں ہے۔ اس فٹنس کے ساتھ بہتر رزلٹ نہیں ملیں گے۔