سڈنی: قومی کرکٹ ٹیم کے فاسٹ بولر نسیم شاہ کا کہنا ہے کہ جنوبی افریقہ کے خلاف میچ جیتنے کی بھرپور کوشش کریں گے۔
٠٢ نومبر ٢٠٢٢
سڈنی میں میڈیا سے بات کرتے ہوئے قومی ٹیم کے پیسر نے کہا کہ ابتدائی دو میچز میں شکستوں کا سب کو دکھ ہوا، بہرحال اب آگے کی طرف دیکھنا ہوگا، ہمارا کام کوشش کرنا ہے، جو نصیب میں ہوا مل جائے گا۔ ورلڈکپ میں سب ٹیمیں ہی جیت کا خواب لے کر آتی ہیں، گرین شرٹس نے بھی سوچا تھا کہ اچھی کارکردگی دکھائیں گے مگر سارے خواب پورے نہیں ہوتے۔ ہم بھی ورلڈکپ جیتنے کا خواب لے کر آئے تھے لیکن کرکٹ میں غیرمتوقع چیزیں بھی ہوجاتی ہیں۔
نسیم شاہ نے کہا کہ بھارت سے شکست کے بعد ٹیم کا مورال بہت نیچے چلے جانے کا تاثر درست نہیں، ہر کھلاڑی نے پوری کوشش کی لیکن کامیابی نہیں ملی۔ ہماری پوری توجہ اب جنوبی افریقہ کے خلاف میچ جیتنے پر ہے۔
دوسری جانب قومی ٹیم سپر 12 مرحلے کے اپنے چوتھے میچ میں کل جنوبی افریقہ کے خلاف میدان میں اُترے گی۔
اگرچہ پوائنٹس ٹیبل پر قومی ٹیم کی ایونٹ کے سیمی فائنل میں پہنچنے کے امکانات نہ ہونے کے برابر ہیں تاہم جنوبی افریقہ کے خلاف میچ میں لازمی فتح درکار ہے۔
جنوبی افریقہ نے اپنے گزشتہ میچ میں بھارت کو شکست دی تھی۔
.jpg)
