کوئی بھی شخص کسی کھلاڑی کو 25 ہزار سے زائد مالیت کا تحفہ دے تو اے سی یو کو بتانے کی ہدایت کی گئی ہے۔
٢١ فروری ٢٠٢٤
ایچ بی ایل پی ایس ایل9 میں شریک ٹیموں کو 4 مشکوک افراد کی تصاویر دکھا کر ان سے دور رہنے کی تاکید کردی گئی۔
ایچ بی ایل پی ایس ایل9 میں ماضی میں بعض میچ فکسنگ کے واقعات بھی سامنے آ چکے ہیں، اس وجہ سے پی سی بی اب کھلاڑیوں کو مشکوک عناصر سے دور رکھنے کے لیے سخت انتظامات کرتا ہے اوراس بار بھی ایسا ہی ہوا۔
ذرائع نے بتایا کہ لیگ میں شریک کرکٹرز اور سپورٹنگ اسٹاف کو خاص طور پر چار مشکوک افراد کی تصاویر دکھا کر ان سے دور رہنے کی ہدایت دی گئی ہے، ان میں سے ایک سابق پاکستانی ریجنل کرکٹ کوچ ہے جبکہ 2 افراد کا تعلق بھارت سے ہے اور ایک بنگلہ دیشی ہے۔
سب کو سختی سے کہا گیا ہے کہ اگر ان میں سے کوئی بھی کہیں نظر آئے تو بات چیت سے گریز کریں اور فوری طور پر اینٹی کرپشن آفیشل کو رپورٹ کی جائے۔
واضح رہے کہ ٹیم ہوٹل کو مکمل طور پر بک نہیں کرایا گیا، اس وجہ سے عام افراد کا آنا جانا معمول کی بات ہے،مداحوں کے روپ میں بھی بکیز کھلاڑیوں سے ملنے کی کوشش نہ کریں اس کے لیے بھی انتظامات کیے گئے ہیں۔
سب کو ہدایت ملی ہے کہ اگر کوئی شخص کسی کھلاڑی کو 25 ہزار روپے سے زائد مالیت کا تحفہ دے تو فوری طور پر اے سی یو کو اطلاع دی جائے، پلیئرز کو باہر سے کھانا منگوانے کی اجازت بھی نہیں ہے۔
