پی ایس ایل9: بابر کو قیادت چھوڑنے کے مشورے ملنے لگے  

قومی کرکٹ ٹیم کے سابق کپتان بابراعظم کو پاکستان سپر لیگ (پی ایس ایل) میں بھی فرنچائز کی قیادت چھوڑنے کے مشورے ملنے لگے۔ 
ورلڈکپ 2023 کی ناکام مہم کے بعد بابراعظم تینوں فارمیٹس میں قومی ٹیم کی قیادت سے دستبردار ہوگئے تھے،اب ان کو پی ایس ایل میں فرنچائز ٹیم کی کپتانی چھوڑنے کے بھی مشورے ملنے لگے ہیں۔ 
ایک سپورٹس پروگرام میں گفتگو کرتے ہوئے قومی ٹیم کے سابق کپتان وسیم اکرم نے کہا کہ میں نے تو 2 سال قبل بھی بابر اعظم سے کہا تھا کہ لیگ کرکٹ میں قیادت نہ کرو،آپ ایک بڑے کرکٹر ہیں،اپنی رقم لیں، میچز کھیلیں، رنز بنائیں اور گھر جائیں اور نئے ایونٹ میں شرکت کی تیاری کریں، پاکستانی ٹیم کی کپتانی تو ٹھیک ہے مگر لیگ کرکٹ میں یہ بلاوجہ اضافی دباؤ لینے والی بات ہے۔   
سابق بھارتی کرکٹر گوتم گھمبیر نے سوئنگ کے سلطان کی بات سے اتفاق کرتے ہوئے کہا کہ میں نے ورلڈکپ 2023 سے قبل بابر اعظم کے ٹاپ اسکورر رہنے کی پیشگوئی کردی تھی مگر قیادت کے دباؤ سے ان کی پرفارمنس بھی متاثر ہوگئی، اس سے آزاد ہوکر اب بہترین صلاحیتیں کھل کر سامنے آئیں گی، اب میدان میں شائقین کو ایک مختلف بابر اعظم دیکھنے کو ملے گا۔
انہوں نے مزید کہا کہ انھیں پی ایس ایل جیت کر بھی کچھ نہیں ملے گا مگر بیٹنگ پر توجہ دیں گے تو پاکستان کی تاریخ کے بہترین بیٹر کی حیثیت سے اپنا نام درج کرواسکتے ہیں، کپتانی کا پریشر ختم ہونے کے بعد امید ہے کہ بابر مزید 10سال تک کرکٹ کی دنیا میں اپنی صلاحیتوں کے جوہر دکھاتے نظر آئیں گے۔