پی ایس ایل9: کون کون سے ریکارڈ ٹوٹ سکتے ہیں؟  

پاکستان سپر لیگ (پی ایس ایل) کے نویں ایڈیشن کے آغاز میں محض 3 روز باقی رہ گئے ہیں تاہم ہر گزرتے دن کے ساتھ شائقین میں جوش و خروش بڑھتا جا رہا ہے۔ 
نویں سیزن کے آغاز سے قبل آئیے آپکو بتاتے ہیں کچھ منفرد ریکارڈز کے بارے میں جو متعدد کھلاڑیوں نے بنارکھے ہیں۔ 
سب سے زیادہ میچز کھیلنے کا ریکارڈ: 
پی ایس ایل میں پشاور زلمی کی نمائندگی کرنے والے قومی ٹیم کے سابق فاسٹ اور موجودہ چیف سلیکٹر وہاب ریاض کا نام سرِ فہرست ہے، جنہوں نے سب سے زیادہ 88 میچز کھیل رکھے ہیں جبکہ دوسرے نمبر پر81 میچز کے ساتھ کراچی کنگز کے شعیب ملک ہیں۔  
کوئٹہ گلیڈی ایٹرز کے سابق کپتان سرفراز احمد اس فہرست میں تیسرے نمبر ہیں، انہوں نے 80 میچز کھیلنے کا اعزاز حاصل کررکھا ہے۔ 
سب سے زیادہ وکٹیں: 
پی ایس ایل میں کھیلے گئے 88 میچوں میں 113 وکٹیں لے کر وہاب ریاض آل ٹائم ٹاپ وکٹ ٹیکر ہیں، حسن علی 94 وکٹوں کے ساتھ دوسرے جبکہ شاہین شاہ آفریدی 62 میچوں میں 89 وکٹوں کے ساتھ تیسرے نمبر پر موجود ہیں۔ 
سب سے زیادہ سینچریاں: 
پشاور زلمی کے سابق کھلاڑی اور پی ایس ایل کے بہترین بلے بازوں میں سے ایک کامران اکمل نے 7 سیزنز میں 3 سنچریاں بنائیں، جو کہ سب سے زیادہ ہے۔ ان کے پیچھے جیسن رائے، شرجیل خان، ریلی روسو اور فخر زمان ہیں جو 2،2 سنچریاں بناچکے ہیں۔ 
ایک اننگز میں سب سے زیادہ چھکے: 
پی ایس ایل 2020 کےسیزن میں لاہور قلندرز کے بین ڈنک ایک اننگز میں سب سے زیادہ چھکے لگانے والے کھلاڑی ہیں، انہوں نے یہ کارنامہ 2 بار سرانجام دیا۔ کراچی کنگز کیخلاف میچ میں انہوں نے 12 چھکے لگائے جبکہ کوئٹہ گلیڈی ایٹرز کیخلاف 10 چھکے ایک اننگز میں لگائے تھے تاہم وہ رواں سیزن میں پی ایس ایل کا حصہ نہیں ہیں۔ 
واضح رہے کہ پی ایس ایل کے نویں سیزن کا آغاز 17 فروری سے ہوگا جبکہ ایونٹ کا فائنل کراچی کے نیشنل اسٹیڈیم میں 18 مارچ کو شیڈول ہے۔