رمیز راجہ قومی ٹیم کی ناقص کارکردگی کے دفاع میں سامنے آگئے

ایکسپریس نیوز کے مطابق چیئرمین پاکستان کرکٹ بورڈ (پی سی بی) نے قومی ٹیم کی ناقص کارکردگی کا دفاع کرتے ہوئے کہا ہے کہ  گرین شرٹس کے کھیلنے کا اپنا انداز اور طریقہ ہے اور میرے حساب سے اس میں کوئی غلطی نہیں ہے۔ 

ان کا کہنا تھا کہ اسی انداز میں 12 ماہ میں 80 فیصد میچز جیتے ہیں، کئی سنسنی خیز مقابلوں میں کامیابی حاصل کی اور مختلف ایونٹس کے ناک آؤٹ مرحلے تک رسائی حاصل کی۔

رمیز راجہ کا کہنا تھا کہ کہا جاتا ہے کہ بٹن دبائیں اور آسٹریلیا کی طرح جارحانہ انداز میں کرکٹ کھیلیں، یہ بھی کہا جاتا ہے کہ ہم پرانے زمانے کی کرکٹ کھیلتے ہیں۔

چیئرمین پی سی بی نے کہا کہ یہ ماڈرن ڈے کرکٹ نہیں ہے، اس تجزیے کو درست مانتا ہوں لیکن پاکستان ٹیم اسی انداز میں کھیل کر کامیابیاں بھی حاصل کرتی رہی ہے۔

انہوں نے مزید کہا کہ ماڈرن ڈے کرکٹ کے لیے 100کرکٹرز کا پاتھ وے پروگرام اور پاکستان جونیئر لیگ کا سلسلہ شروع کیا ہے، اگلے4برسوں میں آپ کو تیار گھوڑے ملیں گے، موجودہ ٹیم پر اتنا ہی دباؤ ڈالیں گے جتنا ڈال سکتے ہیں۔