ورلڈکپ جیتنے کے بعد رویندر جڈیجہ بھی ٹی 20 چھوڑنے والے بھارتی کھلاڑی

روہت شرما اور ویرات کوہلی کے بعد تیسرے بھارتی کھلاڑی نے بھی ٹی 20 سے ریٹائرمنٹ کا اعلان کردیا۔ رویندر جڈیجہ، جو ہندوستان کے ٹی ٹوئنٹی اسکواڈ کا اہم حصہ رہے ہیں، نے جذباتی پیغام کے ذریعے کرکٹ کے مختصر فارمیٹ سے ریٹائرمنٹ لینے کا اپنا فیصلہ شیئر کیا۔
تفصیلات کے مطابق  بھارتی ٹیم کے اسٹار آل راؤنڈر رویندر جڈیجا نے بھی ٹی 20 کرکٹ سے ریٹائرمنٹ کا اعلان کردیا۔ ٹی 20 ورلڈکپ 2024 جیتنے کے بعد رویندر جڈیجہ بھی ٹی 20 چھوڑنے والے بھارتی کھلاڑی بن گئے۔ بھارتی میڈیا کے مطابق رویندر جڈیجا نے بھی ورلڈ کپ میں فتح حاصل کرنے کے بعد ویرات کوہلی اور روہت شرما کی تقلید کرتے ہوئے کرکٹ کے مختصر ترین فارمیٹ سے ریٹائرمنٹ کا اعلان کردیا۔
بھارتی آل راؤنڈر نے اپنے آفیشل انسٹاگرام اکاؤنٹ پر ٹی 20 انٹرنیشنل کرکٹ سے اپنی ریٹائرمنٹ کی تصدیق کی ہے تاہم وہ ٹیسٹ اور ون ڈے میں ٹیم کی نمائندگی جاری رکھیں گے۔ 
رویندر جڈیجہ نے 74 ٹی 20 انٹرنیشنل میچز میں بھارت کی نمائندگی کی جس میں انہوں نے 41 اننگز میں 515 رنز بنائے جس میں سے 17 میں وہ ناٹ آؤٹ رہے، انہوں نے مختصر ترین فارمیٹ میں 54 وکٹیں بھی حاصل کیں۔ 
واضح رہے کہ بھارت نے ہفتے کےروز ٹی 20 ورلڈ کپ 2024 کے فائنل میں جنوبی افریقہ کو سنسنی خیز مقابلے کے بعد 7 رنز سے شکست دے کر دوسری بار عالمی چیمپئن بننے کا اعزاز حاصل کیا تھا۔ 
میچ کے بعد اسٹار بیٹسمین ویرات کوہلی اور کپتان روہت شرما نے ٹی 20 کرکٹ سے اپنی ریٹائرمنٹ کا اعلان کیا تھا۔