آئرش پلیئرز سے الجھنا سکندررضا کو مہنگا پڑگیا، 2 میچزکے لیے معطل

آئرلینڈ کے پلیئرز سے الجھنا زمبابوے ٹیم کے کپتان سکندر رضا کو مہنگا پڑگیا جس کی پاداش میں انہیں اگلے 2 میچز کے لیے معطل کر دیا گیا۔ 
ٹیم زمبابوے کے کپتان سکندر رضا اور آئرلینڈ کے کھلاڑیوں کرٹس کیمفر اور جوش لٹل پر پہلے ٹی ٹوئنٹی کے دوران میدان میں جھگڑے میں ملوث ہونے پر جرمانہ عائد کردیا گیا۔
تفصیلات کے مطابق پہلے ٹی 20 میچ کے دوران آئرش پلیئرز سے الجھنا زمبابوے کی ٹیم کے کپتان سکندر رضا کو مہنگا پڑگیا، وہ اگلے 2 میچز سے معطل ہوگئے ہیں۔ 
یہ واقعہ 14 ویں اوور میں پیش آیا جب شاٹ کھیلنے کے بعد سکندررضا نے حریف کرکٹر جوش لٹل سے کوئی بات کی، اتنے میں کرٹس کیمفر آگے بڑھے اور کوئی ایسا فقرہ اچھالا جس سے زمبابوین کپتان غصے میں بھڑک اٹھے، وہ تیزی سے بیٹ کو لہراتے ہوئے آگے بڑھے تاہم امپائر نے انھیں روک دیا۔ 
سکندر رضا نے اس میچ میں 3 وکٹیں لینے کے ساتھ ففٹی بھی بنائی، ان کی ٹیم نے سنسنی خیز مقابلے میں آخری گیند پر ایک وکٹ سے فتح پائی۔ 
بعد ازاں آئی سی سی میچ ریفری اینڈی پائی کرافٹ نے سکندر رضا پر 50 فیصد میچ فیس جرمانہ عائد کرنے کے ساتھ ریکارڈ میں 2 ڈی میرٹ پوائنٹس شامل کیے، جس سے ان کے مجموعی پوائنٹس کی تعداد 4 تک پہنچ گئی، اس لیے وہ خود بخود اگلے 2 میچز سے معطل ہوگئے، ان کی جگہ گذشتہ روز زمبابوین ٹیم کی قیادت سین ولیمز نے سنبھالی۔ 
آئرلینڈ کے کرکٹر کرٹس کیمفر اور جوش لٹل پر 15، 15 فیصد میچ فیس جرمانہ کرنے کے ساتھ ڈسپلنری ریکارڈ میں ایک ایک پوائنٹ شامل کیا گیا ہے۔