news
English

 بابر، رضوان، شاہین اوردیگر کرکٹرز کو این او سی کیوں نہیں مل رہا؟

گلوبل ٹی 20 کینیڈا کے لیے پاکستانی کھلاڑیوں کو این او سی جاری کرنے میں تاخیر کی وجہ سامنے آگئی۔

 بابر، رضوان، شاہین اوردیگر کرکٹرز کو این او سی کیوں نہیں مل رہا؟

وینکوور نائٹس نے محمد رضوان کو کپتان مقرر کر دیا، بابر اعظم اور محمد عامر بھی اسکواڈ میں شامل ہوگئے تاہم لیگ کو تاحال آئی سی سی کی جانب سے منظوری نہیں دی گئی۔ 
تفصیلات کے مطابق کینیڈا کی گلوبل ٹی20 لیگ کا چوتھا ایڈیشن رواں ماہ 25 جولائی سے 11 اگست تک ہوگا تاہم ایونٹ کو ابھی تک انٹرنیشنل کرکٹ کونسل (آئی سی سی) کی جانب سے منظور نہیں کیا گیا ہے۔ 
میڈیا رپورٹس کے مطابق منتظمین کا کہنا ہے کہ کینیڈا کرکٹ بورڈ نے اپنے واجبات تاحال ادا نہیں کیے، جس کے باعث لیگ کی منظوری نہیں دی گئی۔ 
بھارت سے تعلق رکھنے والی فرنچائز کے مالک کی مبینہ مشکوک سرگرمیوں اور اس کی تحقیقات کی اطلاعات موصول ہوئی ہیں، جس میں آنے والے دنوں میں ممکنہ طور پر سنسنی خیز تفصیلات سامنے آنے کی توقع ہے۔ 
آئی سی سی نے ایسے معاملات پر تبصرہ نہ کرنے کی اپنی پالیسی برقرار رکھی ہے۔
ایونٹ میں شرکت کے لئے پاکستانی ٹیم کے کئی بڑے ناموں کو این او سی کا انتظار ہے جس میں فاسٹ بولر شاہین شاہ آفریدی، محمد رضوان، وائٹ بال کیپٹن بابراعظم، محمد نواز اور محمد عامر شامل ہیں۔ تاہم پی سی بی نے آئی سی سی کی جانب سے ٹورنامنٹ کی عدم منظوری کو وجہ بتاتے ہوئے ایونٹ کے لیے کھلاڑیوں کو ابھی تک این او سی جاری نہیں کیا۔ 
قبل ازیں بورڈ نے اعلان کیا تھا کہ کھلاڑیوں کے ورک لوڈمینجمنٹ کو دیکھتے ہوئے انہیں محدود لیگز میں شرکت کی اجازت دے گا تاہم ابھی تک اس حوالے سے مکمل تفصیلات سامنے نہیں آئی ہیں۔