ریونیوشیئرنگ کامعاملہ: کومیلاوکٹورینز کی بی پی ایل میں حصہ نہ لینےکی دھمکی

بنگلہ دیش پریمئیر لیگ (بی پی ایل) کی 4 بار کی فاتح ٹیم کومیلا وکٹورینز کی اونر نے ریونیو شیئرنگ کے معاملات پر ایونٹ میں حصہ نہ لینے کی دھمکی دے دی۔ 
ایونٹ کے آغاز سے محض 3 روز قبل معروف فرنچائز کومیلا وکٹورینز کی اونر نفیسہ کمال کا کہنا ہے کہ بنگلہ دیش پریمئیر لیگ کی گورننگ باڈی کے ساتھ ٹورنامنٹ کے دوران کام جاری رکھنا مشکل ہوگیا ہے۔ 
سال 2019 میں ایک انٹرویو کے دوران کومیلا وکٹورینز کی مالک نفیسہ کمال نے بتایا تھا کہ ریونیو شیئرنگ ماڈل کو بی پی ایل میں آنا چاہیے لیکن 4 سال بعد اس سلسلے میں کچھ بھی نہیں بدلا جبکہ 2022 میں گورننگ کونسل نے فرنچائزز کو کہا تھا کہ ریونیو شیئرنگ میں کوئی دلچسپی نہیں رکھتے۔ 
ان کا کہنا تھا کہ اگر ریونیو شیئرنگ کے معاملے پر اشتراک نہیں کیا گیا تو 100 فیصد ہم بنگلہ دیش پریمئیر لیگ کا حصہ نہیں رہیں گے، ہمیں ٹکٹس رائٹس، میڈیا رائٹس اور گراؤنڈ رائٹس میں حصہ چاہیے۔ 
نفیسہ کمال نے مزید کہا کہ لیگ کے آغاز سے قبل کہا تھا کہ اتنی بڑی آبادی ہونے کے باوجود ہم نشریات میں پیچھے ہیں، بورڈ ہمیں کسی قسم کی سہولت فراہم نہیں کرتا، اس لیے ہمارے لیے بی پی ایل میں حصہ لینا ممکن نہیں ہوگا۔