محمد رضوان نے یویو ٹیسٹ میں مثالی فٹنس ثابت کردی

لاہور: پری سیزن کیمپ کے پہلے روز محمد رضوان نے یویوٹیسٹ میں مثالی فٹنس ثابت کردی۔

قومی کرکٹرز کے 2روزہ فٹنس ٹیسٹ کا نیشنل کرکٹ اکیڈمی لاہور میں آغاز ہوگیا، پہلے مرحلے میں 18کھلاڑیوں کی آزمائش ہورہی ہے، ان میں سرفراز احمد،یاسر شاہ، شاہین آفریدی، اسد شفیق، حارث سہیل، شان مسعود، محمد رضوان، عثمان شنواری، فخر زمان،امام الحق، وہاب ریاض،عابدعلی، راحت علی،افتخار احمد، ظفر گوہر ، بلال آصف اور میر حمزہ شامل ہیں، شاداب خان 22 اگست، اظہر علی 24 اور حسن علی 26اگست کو پہنچیں گے، گذشتہ روز کیمپ کمانڈنٹ مصباح الحق نے کرکٹرز کو لیکچر دیتے ہوئے مسقتبل کے چیلنجز کیلیے تیار کیا۔

ذرائع کے مطابق انھوں نے کھلاڑیوں سے کہا کہ فٹنس کے ساتھ مہارت بہتر بنانے پر بھی بھرپور توجہ مرکوز رکھنا ہوگی،کسی بھی ایتھلیٹ کا اپنے ساتھ ایماندار ہونا انتہائی ضروری ہے،ٹیم ورک اور ایک دوسرے کی مدد کے بغیر بڑی کامیابیاں نہیں حاصل کی جا سکتیں، اگلی سیریز سے قبل کیمپ میں محنت کرتے ہوئے اپنی خامیوں کو دور کرنے کے موقع سے بھرپور فائدہ اٹھائیں۔

کرکٹرز کو گروپس میں تقسیم کرکے یویو ٹیسٹ لیے گئے، محمد رضوان نے 19.2پوائنٹس کے ساتھ مثالی فٹنس ثابت کردی،شان مسعود نے 19.1اور اسد شفیق نے 19پوائنٹس حاصل کیے، کھلاڑیوں کو انٹرنیشنل کرکٹ کے تقاضوں سے ہم آہنگ ہونے کیلیے مزید محنت جاری رکھنے کی بھی ہدایت دی گئی ہے۔