اس پرچم کے سائے تلے ہم ایک ہیں، رضوان کا سوشل میڈیا پر پیغام

قومی ٹیم کے پیسر شاہین شاہ آفریدی کے بعد وکٹ کیپر بیٹر محمد رضوان نے بھی قومی ٹیم میں اختلافات کی قیاس آرائیوں کو مسترد کردیا۔ 
محمد رضوان نے ڈریسنگ روم میں کھلاڑیوں کے درمیان مبینہ لڑائی کی افواہوں کو زائل کرنے کیلئے سوشل میڈیا پلیٹ فارم ’ایکس‘ پر ایک تصویر پوسٹ کی ہے جس میں تمام کھلاڑی گراؤنڈ کے اندر گول دائرے میں ایک دوسرے کے کاندھوں میں ہاتھ ڈال کر کھڑے ہیں اور عقب میں قومی پرچم لہراتا نظر آ رہا ہے۔ 
محمد رضوان نے اپنی پوسٹ میں مشہور ملی نغمے ’’اس پر چم کے سائے تلے ہم ایک ہیں، ہم ایک ہیں‘‘ کے اشعار لکھے جس کے ذریعے کھلاڑیوں کے درمیان اختلافات کی خبروں کو مسترد کرکے یکجہتی کا پیغام دیا گیا ہے۔ 
یاد رہے کہ ایشیا کپ میں سری لنکا کے ہاتھوں شکست کے بعد ٹیم میٹنگ کے دوران کھلاڑیوں کے مابین گرما گرمی اور لفظی تکرار کی اطلاعات سامنے آئی تھیں۔  
میڈیا رپورٹس میں کہا گیا تھا کہ کپتان بابراعظم نے سینئر کھلاڑیوں کی کارکردگی پر عدم اطمینان کا اظہار کیا جس کے جواب میں شاہین آفریدی ان کی حمایت میں بول پڑے تھے۔ دونوں کے درمیان مبینہ طور پر تکرار ہوئی جس پر رضوان نے صلح صفائی کرائی تھی۔ 
قبل ازیں گزشتہ روز شاہین آفریدی نے بھی سوشل میڈیا پر بابراعظم کے ساتھ اپنی تصویر شیئر کی تھی جس نے دونوں کے درمیان اختلافات کی قیاس آرائیوں کو ختم کردیا تھا۔  
بابراعظم نے منگل کے روز کراچی میں شاہین آفریدی کی بارات میں بھی شرکت کی تھی اور اس موقع پر دونوں قومی کرکٹرز ایک دوسرے کے ساتھ کافی خوشگوار موڈ میں نظر آئے۔