سابق بھارتی کرکٹر کے خلاف دھوکہ دہی کا مقدمہ درج  

بھارتی ٹیم کے سابق فاسٹ بولر ایس سری سانتھ کے خلاف دھوکا دہی کے الزام میں مقدمہ درج کروادیاگیا۔ 
بھارتی میڈیا کی رپورٹس کے مطابق سابق کرکٹر ایس سری سانتھ سمیت 2 دیگر افراد پر کیرالہ کے ایک رہائشی نے دھوکہ دہی کا الزام لگایا ہے، جس میں اس نے موقف اپنایا ہے کہ اسپورٹس اکیڈمی میں شراکت کا وعدہ کرکے ان سے بھاری رقم بٹوری گئی۔ 
مقدمے میں کیرالہ کے رہائشی ساریگ بالاگوپالن نے بتایا کہ راجیو کمار اور وینکٹیش کنی نے 18 لاکھ روپے سے زائد کی رقم لی اور کہا کہ میرے نام پر ایک ریزورٹ میں عمارت تعمیر کریں گے جبکہ شکایت کنندہ کو اسپورٹس اکیڈمی میں شراکت دار بنانے کا وعدہ بھی کیا گیاتھا، یہ پراجیکٹ سابق کرکٹر ایس سری سانتھ کے ذریعے شروع کیا جانا تھا۔ 
الزام میں کہا گیا ہے کہ سری سانتھ اور 2 دیگر افراد نے نہ تو اسپورٹس اکیڈمی کے لئے عمارت کی تعمیر شروع کی اور نہ ہی رقم واپس کی۔ 
بھارتی میڈیا کے مطابق مقدمہ درج ہونے پر مجسٹریٹ کورٹ نے اس کیس کی سماعت کی اورمقامی پولیس کو الزامات کی تحقیقات کا حکم دیا ہے۔ 
دوسری جانب سابق کرکٹر ایس سری سانتھ نے واقعے سے لاعلمی کا اظہار کرتے ہوئے کہا کہ میرا ان سے کوئی تعلق نہیں تاہم یقین دلاتا ہوں کہ ان افراد کے خلاف قانونی کارروائی کی جائے گی۔