لاہور: مریدکے میں سابق کرکٹر کو فائرنگ کرکے قتل کردیا گیا

پنجاب کے علاقے مریدکے میں ٹیسٹ کرکٹر قیصر عباس کے ماموں سید نسیم عباس کو فائرنگ کرکے قتل کردیا گیا۔

ایکسپریس نیوز کے مطابق سابق کرکٹر نسیم عباس نماز فجر کے لیے گھر سے نکلے تھے کہ نامعلوم افراد نے ان پر فائرنگ کردی، رخمی کرکٹر کو طبی امداد کے لیے لاہور منتقل کیا گیا تاہم وہ جانبر نہ ہوسکے۔

مقتول کی لاش کو ضابطے کی کارروائی کے لئے اسپتال منتقل کردیا گیا ہے جبکہ پولیس نے واقعہ کی تحقیقات شروع کردی ہے۔

فیملی ذرائع کا کہنا ہے کہ سید نسیم عباس کی کسی سے دشمنی نہیں تھی، مقتول نے لواحقین میں 2 بیٹے اور 2 بیٹیاں سوگوار چھوڑی ہیں۔

واضح رہے کہ سابق کرکٹر نسیم عباس لاہور ڈویژن کی طرف سے فرسٹ کلاس کرکٹ کھیل چکے ہیں۔