لٹل ماسٹر سچن ٹنڈولکر کے بارے میں کہا جاتا ہے کہ وہ دنیائے کرکٹ کے بے تاج بادشاہ ہیں
٣١ مئی ٢٠٢٣
دنیائے کرکٹ میں 1989 میں ڈیبیو کرنے والے بھارتی ٹیم کے سابق اسٹار اوپنر سچن ٹنڈولکر نے 200 ٹیسٹ میچوں میں 15 ہزار 921 رنز بنائے ہیں جب کہ 463 ایک روز میچز میں ان کے بیٹ نے 18 ہزار 426 رنز سمیٹے ہیں۔
سچن ٹنڈولکر نے 2013 میں کرکٹ کی دنیا کو خیر باد کہہ دیا تھا لیکن ان کا جادو اب بھی سر چڑھ کے بولتا ہے۔ نوجوان کرکٹرز کے وہ ماڈل بلے باز ہیں اور ان کی فٹنس لاجواب ہے۔ کرکٹ کا کون سا ایسا شیدائی ہے جو ٹنڈولکر کو نہیں جانتا۔
اپنے کرکٹ کیریئر میں کامیابیاں سیمٹنے کے ساتھ ساتھ سچن ٹنڈولکر نے اپنی زندگی میں جو اہداف مقرر کیے انہیں حاصل کیا اور ایک قابل رشک زندگی بسر کر رہے ہیں۔ ایک انٹرویو میں اپنی ان کامیابیوں پر سابق کرکٹر نے کھل کر بات کی۔
ایک سوال کے جواب میں سچن ٹنڈولکر نے کرکٹ کے میدان اور اس سے باہر کی زندگی میں اپنی کامیابیوں کا سہرا اپنی فٹنس کو قرار دیا۔
اسٹار بیٹسمین نے فٹنس کی اہمیت پر زور دیتے ہوئے کہا کہ فٹنس اور نظم و ضبط کی مدد سے اپنی زندگی کا ہر ہدف حاصل کیا جاسکتا ہے۔ میری کامیابیوں کا راز صرف اور صرف ڈسپلن اور فٹنس ہے۔
سچن ٹنڈولکر نے بتایا کہ وہ بچپن میں ہر وقت کھیلتے رہتے تھے۔ سارے ہی کھیل کھیلتا رہتا تھا اس لیے کسی ایک پر فوکس نہ تھا لیکن پھر میں نے زندگی میں ڈسپلن لانے اور کسی ایک کھیل کو اپنانے پر توجہ دی اور کرکٹ کا انتخاب کیا۔
سابق بھارتی کپتان کے بقول کرکٹ میں یہ سیکھا کہ اگر مستقل اور لازاوال کامیابیاں حاصل کرنی ہیں تو فٹنس برقرار رکھنا ضروری ہے اور فٹنس کے لیے ڈسپلن ہونا بہت ضروری ہے۔ یہی دو چیزیں مل کر کامیاب انسان بناتی ہیں۔
سچن ٹنڈولکر نے کہا کہ آج کل فٹ رہنا فیشن بن گیا ہے لیکن یہ صرف باڈی بنانے یا شکل اچھی کرنے کا نام نہیں بلکہ یہ مکمل حفظان صحت ہے جس کے بارے میں سب کو آگاہ رہنا ضروری ہے۔
اپنے والد کا زکر کرتے ہوئے اسٹار بلے باز نے بتایا کہ سگریٹ کے اشتہارات میں کام کرنے کی کئی پیشکشیں ہوئیں لیکن میرے والد نے تاکید کی تھی کہ سگریٹ نوشی کے فروغ کا حصہ نہ بننا۔
سچن ٹنڈولکر نے بتایا کہ والد کی ہدایت پر آج بھی عمل پیرا ہوں اور سگریٹ کے کسی اشتہار میں کام نہیں کرتا۔
