پاکستان، افغانستان اوریواے ای کی 3 فریقی سیریز کے شیڈول کا اعلان

پاکستان کی انڈر 19ٹیم متحدہ عرب امارات (یو اے ای) میں 3 فریقی ون ڈے سیریز کھیلے گی، پاکستان، افغانستان اور متحدہ عرب امارات پر مشتمل انڈر 19 سہ فریقی سیریز کے شیڈول کا باضابطہ اعلان کر دیا گیا ہے۔
تفصیلات کے مطابق پاکستان مینز انڈر 19کرکٹ ٹیم اس سال نومبر میں 50اوورز کی 3 فریقی سیریز میں حصہ لے گی جس میں متحدہ عرب امارات اور افغانستان کی ٹیمیں بھی شامل ہوں گی، متحدہ عرب امارات اس سیریز کا میزبان ہے۔ پاکستان کرکٹ بورڈ (پی سی بی) کے جاری کردہ اعلامیے کے مطابق ڈبل لیگ کی بنیاد پر ہونے والے اس ایونٹ کے افتتاحی میچ میں پاکستان کا مقابلہ متحدہ عرب امارات سے ہوگا جبکہ
سیریز کی دو ٹاپ ٹیمیں فائنل کے لیے کوالیفائی کریں گی۔
یہ سیریز اے سی سی مینز انڈر 19ایشیا کپ سے قبل کھیلی جائے گی جس کے مقام اور تاریخوں کا اعلان مناسب وقت پر کیا جائے گا۔ یو اے ای کے دورے سے قبل پی سی بی، نیشنل انڈر 19کپ (ایک روزہ فارمیٹ) اور نیشنل انڈر19 چیمپئن شپ (تین روزہ فارمیٹ) کا انعقاد کرے گا جس کا آغاز رواں سال اکتوبر میں ہوگا۔ یہ ٹورنامنٹ انڈر 19کھلاڑیوں کے لیے پاکستانی اسکواڈ میں جگہ بنانے کا بہترین موقع فراہم کرے گا۔ 
پی سی بی کے ڈائریکٹر انٹرنیشنل کرکٹ عثمان واہلہ کا کہنا ہے کہ ہمیں خوشی ہے پاکستان مینز انڈر 19ٹیم اے سی سی مینز انڈر19ایشیا کپ سے قبل متحدہ عرب امارات میں انڈر 19سہ فریقی سیریز میں حصہ لے گی۔ یہ نوجوان کھلاڑیوں کے لیے اپنی صلاحیتوں کو نکھارنے کا بہترین موقع ہوگا۔ پی سی بی اس سہ فریقی سیریز کا اہتمام کرنے پر ایمریٹس کرکٹ بورڈ کا شکر گزار ہے جو دونوں بورڈز کے درمیان مضبوط روابط اور نوجوان کھلاڑیوں کی ترقی کے لیے ہمارے مشترکہ عزم کو بھی ظاہر کرتا ہے۔
انڈر 19سہ فریقی سیریز (50 اوورز) کے شیڈول کے مطابق 13 نومبر کو پاکستان اور متحدہ عرب امارات کے درمیان میچ کھیلا جائے گا جبکہ 15نومبرکو افغانستان بمقابلہ پاکستان،17 نومبرکو متحدہ عرب امارات بمقابلہ افغانستان، 19 نومبرکو پاکستان بمقابلہ افغانستان، 21 نومبرکو افغانستان بمقابلہ متحدہ عرب امارات، 23 نومبر کو متحدہ عرب امارات بمقابلہ پاکستان اور 26نومبر کوفائنل کھیلا جائے گا۔