شاداب خان کا بھارتی چیف سلیکٹر اجیت اگرکر کو کرارا جواب

بھارتی کرکٹ ٹیم کے چیف سلیکٹر اجیت اگرکر کو قومی ٹیم کے نائب کپتان شاداب خان نے ان کے ایک متنازع بیان پر کرارا جواب دے دیا۔ 
گزشتہ دنوں بھارتی سلیکشن کمیٹی کے چیئرمین اجیت اگرکر اور کپتان روہت شرما نے مشترکہ پریس کانفرنس کرتے ہوئے ایشیاکپ کے لئے 17 رکنی اسکواڈ کا اعلان کیا تو اس موقع پر صحافیوں کی جانب سے سوال کیا گیا کہ پاکستانی فاسٹ بولرز شاہین آفریدی اور حارث رؤف کے خلاف کوئی پلان ہے؟
جس پر سلیکشن کمیٹی کے چیئرمین اجیت اگرکر نے مسکراتے ہوئے جواب دیا کہ ’’ویرات کوہلی انہیں دیکھ لیں گے‘‘۔ 
اس پر ردعمل دیتے ہوئے گزشتہ روز قومی ٹیم کے نائب کپتان شاداب خان نے کہا کہ کوئی کچھ بھی بول دے ان کے بولنے سے کچھ نہیں ہوتا، اہمیت اس بات کی ہے کہ جب میچ ہوگا تو حقیقت کھل کر سامنے آجائے گی۔ 
قومی ٹیم نے افغانستان کے خلاف تین میچوں کی سیریز میں کلین سوئپ کرتے ہوئے کامیابی حاصل کی ہے، جس کے ساتھ ہی پاکستان عالمی رینکنگ میں نمبر ایک ٹیم بن چکی ہے۔ 
دوسری جانب ایشیاکپ کے لئے قومی ٹیم کی تیاریوں کا سلسلہ جاری ہے، ایونٹ کا آغاز 30 اگست سے پاکستان اور نیپال کے درمیان میچ سے ہوگا جبکہ روایتی حریف بھارت اور پاکستان کی ٹیمیں 2 ستمبر کو سری لنکا کے شہر کینڈی میں ایک دوسرے کے مدمقابل ہوں گی۔