شاہین شاہ آفریدی انگلینڈ کے خلاف ٹیسٹ سیریز سے باہر، حارث رئوف ڈیبیو کریں گے

ذرائع کے مطابق ٹی 20 فائنل میں انجری کا دوبارہ شکار ہونے والے شاہین شاہ آفریدی کا وطن واپسی پر مکمل میڈیکل اسکین ہوگا۔ رپورٹس کی روشنی میں بائیں ہاتھ کے پیسر کا ری ہیب پلان ترتیب دیا جاسکے گا۔ ذرائع کا کہنا ہے کہ شاہین شاہ آفریدی ٹیسٹ اسکواڈ میں شامل نہیں ہوں گے، وہ ٹی 20 ورلڈ کپ کے فائنل میں دوبارہ گھٹنے کی انجری کا شکار ہو گئے ہیں، وطن واپسی پر ان کے اسکین ہوں گے۔

ذرائع کے مطابق فاسٹ بولر حارث رؤف انگلینڈ کے خلاف ٹیسٹ سیریز میں ڈیبیو کریں گے جبکہ فاسٹ بولر محمد عباس کی بھی ٹیسٹ اسکواڈ میں شمولیت پر مشاورت جاری ہے۔

حارث رؤف کے ٹیسٹ ڈیبیو اور نسیم شاہ کے ساتھ محمد عباس بھی پاکستان کی پیس بیٹری کا حصہ ہوں گے۔

اسپنر ابرار احمد کو ٹیسٹ اسکواڈ میں شامل کیے جانے کا امکان ہے جبکہ وکٹ کیپر سرفراز احمد کا ٹیسٹ اسکواڈ میں جگہ برقرار رکھنا مشکل ہے۔

ذرائع کا کہنا ہے کہ سیاسی جماعت کے لانگ مارچ اور احتجاج کی وجہ سے وینیو پر بھی مشاورت ہوگی، پی سی بی حکومتی ایڈوائس کے مطابق وینیو سے متعلق فیصلہ کرے گا، انگلینڈ کرکٹ بورڈ سیکیورٹی ایکسپرٹ ریگ ڈیکاسن سے ہدایت لے گا۔

ٹیم مینیجمنٹ نے شاہین کو بڑی انجری سے بچانے اور فاسٹ بولر کے مستقبل کے پیش نظر انگلینڈ کے خلاف یکم دسمبر سے شیڈول تین ٹیسٹ میچز کی سیریز میں  انہیں اسکواڈ کا حصہ نہ بنانے پر اتفاق کیا ہے۔

ان کا خلا پر کرنے کے لیے حارث رؤف کو ٹیم میں شامل کیا جائے گا۔اس حوالے سے وطن واپسی کے بعد ٹیم مینجمنٹ اور سلیکشن کمیٹی کی مشاورت ہوگی، جس کے بعد باقاعدہ ٹیم کا اعلان اگلے ہفتے تک کردیا جائے گا۔

ٹیم میں ڈومیسٹک کرکٹ کے اسپنر ابرار احمد کی بھی شمولیت کے روشن امکانات ہیں۔ تجربہ کار وکٹ کیپر سرفراز احمد کے لیے جگہ برقرار رکھنا مشکل دکھائی دے رہا ہے۔ ہوم سیریز کی وجہ سے ایک وکٹ کیپر محمد رضوان کو ہی پندرہ رکنی اسکواڈ کا حصہ بنایا جاسکتا ہے۔

انگلینڈ کی ٹیسٹ ٹیم نے پہلے سے اعلان کردہ پروگرام کے مطابق ستائیس نومبر کو اسلام آباد پہنچنا ہے۔ ان ہی دنوں پی ٹی آئی کے ممکنہ لانگ مارچ کے سبب مہمان ٹیم کی آمد کے شیڈول کا ازسر نو جائزہ بھی لیا جارہا ہے. اس حوالے سے پاکستان کرکٹ بورڈ حکومتی ایڈوانس کا منتظر ہے۔ بی پلان کے مطابق پہلا ٹیسٹ کراچی، دوسرا ملتان اور تیسرا ٹیسٹ دوبارہ کراچی میں کھیلا جاسکتا ہے۔

واضح رہے کہ پاکستان اور انگلینڈ کے درمیان 3 ٹیسٹ میچز کی سیریز یکم دسمبر سے شروع ہو گی، انگلینڈ کی ٹیسٹ ٹیم 27 نومبر کی صبح اسلام آباد پہنچے گی۔

پاکستان اور انگلینڈ کے درمیان پہلا ٹیسٹ راولپنڈی اسٹیڈیم میں شیڈول ہے۔