ٹی20 بلاسٹ میں شاہین آفریدی کی زبردست پرفارمنس،1اوورمیں4وکٹیں اڑادیں

پاکستانی ٹیم کے پیسرشاہین آفریدی نے ٹی ٹوئنٹی بلاسٹ میں کھیلنے کے تجربے کو یادگار قرار دے دیا

 سماجی رابطے کی ویب سائٹ ٹوئٹر پر جاری کردہ اپنے بیان میں شاہین آفریدی نے کہا کہ ٹی ٹوئنٹی بلاسٹ کا سیزن میرے لیے عظیم یادوں کے ساتھ ختم ہوا۔

شاہین آفریدی نے کہا کہ میں ناٹنگھم شائر ٹیم کی نمائندگی کے لیے سب اراکین کا شکریہ ادا کرتا ہوں، مینجمںٹ اور سب اراکین نے مجھے بہت سپورٹ کیا، فینز کا بھی بہت شکریہ جنہوں نے سپورٹ کیا۔

انہوں نے کہا کہ نوٹنگھم شائر نے بھی آئندہ سیزن کے لیے نیک خواہشات کا اظہار کیا ہے۔

شاہین آفریدی کا کہنا تھا کہ وہ قومی فرض نبھانے کے لیے وطن واپس آرہے ہیں، وہ سری لنکا کے خلاف سیریز کے لیے ٹیسٹ اسکواڈ میں شامل ہیں۔

 دورۂ سری لنکا کے لیے ٹیسٹ اسکواڈ کے اراکین مینجمنٹ کو رپورٹ کریں گے اور کھلاڑی منگل سے کراچی میں ٹریننگ کا آغاز کریں گے۔

واضح رہے کہ گزشتہ دنوں برطانیہ میں کھیلے گئے ٹی ٹوئنٹی بلاسٹ میں پاکستان کے فاسٹ بولر شاہین شاہ آفریدی میچ کے پہلے ہی اوور میں 4 وکٹیں حاصل کرنے والے پہلے بولر بنے تھے۔

نوٹنگھم شائر کی نمائندگی کرنے والے شاہین شاہ آفریدی نے یہ کارنامہ برمنگھم بیئرز کے خلاف کھیلے جانے والے میچ میں سر انجام دیا تھا۔