شاہد آفریدی کے دو چھکوں نے ایشون کا کیریئر ختم کر دیا، حفیظ

لاہور: پاکستان کرکٹ ٹیم کے سابق کپتان محمد حفیظ نے دعویٰ کیا ہے کہ اشیا کپ 2014 کے دوران شاہد آفریدی کے دو چھکوں نے روی چندرن ایشون کا کیریئر ختم کر دیا۔

سماجی رابطے کی سائٹ ٹوئٹر پر سابق کپتان محمد حفیظ نے اپنا ویڈیو کلپ شیئر کیا جس میں انہوں نے کہا کہ شاہد آفریدی نے 2014 کے ایشیا کپ میں ایشون کو یکے بعد دیگرے دو چھکے لگا کر انکا کیریئر ختم کر دیا۔

انہوں نے کہا کہ شاہد بھائی آپ کے اِن دو چھکوں کیلئے بے حد شکریہ جس نے ہماری جیت میں اہم کردار ادا کیا۔

یاد رہے کہ شاہد آفریدی نے بھارت کے خلاف اس میچ میں 18 گیندوں پر 34 رنز کی زبردست اننگز کھیل کر بھارت سے جیتا ہوا میچ چھین لیا تھا، جس پر لاکھوں بھارتی مداحوں نے اپنی ٹیم پر تنقید کے نشتر چلائے تھے۔

دوسری جانب حفیظ کا یہ بیان بہت سے مداحوں کو اچھا نہیں لگا جبکہ انہوں نے حفیظ سے معافی مانگنے کا مطالبہ کیا ہے۔