شمارجوزف، جیمز اینڈرسن کا فیئرویل ٹیسٹ برباد کرنے کو تیار

ویسٹ انڈیز کے نوجوان فاسٹ بولر شمار جوزف نے کہا ہے کہ میری کوشش ہوگی کہ جیمز اینڈرسن کا فیئرویل ٹیسٹ خراب کردوں اور یہ ان کے لیے کوئی اچھی یادگار نہ بنے۔ 
انگلینڈ اور ویسٹ انڈیز کے درمیان افتتاحی ٹیسٹ سے قبل میڈیا سے بات چیت کرتے ہوئے شمار جوزف کا کہنا تھا کہ جیمز اینڈرسن ایک شاندار کرکٹر ہیں جنھیں میں پسند کرتا ہوں اور وہ اس عمر میں بھی بہت اچھی کارکردگی دکھارہے ہیں۔،، 
انہوں نے کہا کہ آپ کہہ سکتے ہیں کہ وہ پرفیکٹ ہیں کیوں کہ انٹرنیشنل کرکٹ میں انھوں نے اس قدر زیادہ وکٹیں لے رکھی ہیں، تاہم یقیناً میں کوشش کروں گا کہ ان کے فیئرویل ٹیسٹ کو خراب کردوں۔ میں انگلینڈ میں کھیلنے کے لیے کافی پُرجوش ہوں، ان کی فاسٹ بولنگ کافی اچھی ہے، میں نے ایشیز میں کئی عظیم فاسٹ بولرز کو کھیلتے ہوئے دیکھا ہے جن میں جوفرا آرچر، مچل اسٹارک سمیت کئی نام شامل ہیں۔،، 
لارڈز ٹیسٹ شروع ہونے سے کچھ عرصہ قبل ہی انگلینڈ کے عظیم فاسٹ بولر جیمز اینڈرسن نے انٹڑنیشنل کرکٹ سے ریٹائرمنٹ کا اعلان کیا تھا۔ اسٹار فاسٹ بولر جیمز اینڈرسن نے کہا تھا کہ وہ ویسٹ انڈیز کے خلاف پہلا ٹیسٹ کھیلنے کے بعد ریٹائر ہوجائیں گے، لارڈز ٹیسٹ ان کے کیریئر کا آخری انٹرنیشنل ٹیسٹ میچ ہوگا۔،، 
خیال رہے کہ جیمز اینڈرسن ٹیسٹ کرکٹ میں 700 وکٹیں لینے والے دنیا کے پہلے فاسٹ بولر ہیں، انھوں نے اس سنگ میل تک پہنچنے کےلیے 187 ٹیسٹ میچز میں شاندار کارکردگی کا مظاہرہ کیا۔ 
جیمز اینڈرسن بھارت کے سچن ٹنڈولکر (200 میچز) کے بعد کرکٹ کی تاریخ میں دوسرے سب سے زیادہ ٹیسٹ میچز کھیلنے والے کھلاڑی بھی ہیں۔ 
علاوہ ازیں انگلش پیسر نے 194 ون ڈے میچز میں 269 وکٹیں حاصل کررکھی ہیں جبکہ 19 ٹی ٹوئنٹی انٹرنیشنل میچز کھیلتے ہوئے بھی انھوں نے 18 وکٹیں اپنے نام کررکھی ہیں۔