شاداب 50، 60 رنز کھا کر بغیر وکٹ لیے خوش نظر آتے ہیں، یہ ذہینت گرین شرٹس کے لیے نقصان دہ ہے، سابق کرکٹر۔
٠٥ اکتوبر ٢٠٢٣
بھارتی کرکٹ ٹیم کے دو سابق کرکٹرز نے پاکستانی ٹیم کے اسپن اٹیک پر کھل کر تنقید کے نشتر چلادیئے۔
غیرملکی میڈیا کو دیئے گئے انٹرویو میں بھارتی ٹیم کے سابق ہیڈکوچ روی شاستری اور اسپنر ہربھجن سنگھ نے آئی سی سی ورلڈکپ میں قومی ٹیم کے ناک آؤٹ مرحلے تک جانے کے امکانات پر بھی تشویش کا اظہار کیااور پاکستان کے اسپن اٹیک کو تنقید کا نشانہ بھی بنایا۔
روی شاستری نے کہا کہ فاسٹ بولر نسیم شاہ کی انجری کے بعد پاکستانی ٹیم کی بالنگ میں کمزور صاف نظر آئی ہے جبکہ اسپن ڈیپارمنٹ میں ماضی کی طرح گرین شرٹس کے پاس اب بھی اچھے بولرز نہیں ہیں۔
اس موقع پر ہربھجن سنگھ نے بھی روی شاستری کی بات کی تائید کرتے ہوئے کہا کہ پاکستان کی اسپن بالنگ کا معیار بہت کم ہوا ہے، انہوں نے نائب کپتان شاداب خان کی بولنگ پر تنقید کرتے ہوئے کہا کہ وہ ہر میچ میں بغیر وکٹ لیے 50، 60 رنز دے کر مطمئن نظر آتے ہیں، اس طرح کی ذہنیت اسپنر کے لیے نقصان دہ ہوتی ہے۔
انہوں نے کہا کہ پاکستانی اسپنرز اگر اسی مائنڈ سیٹ کے ساتھ کھیلیں گے تو وہ اہم مقابلوں میں اپنی ٹیم کو جیت دلانے میں ناکام رہیں گے، ماضی میں پاکستان کے پاس ثقلین مشتاق، سعید اجمل، اور شاہد آفریدی جیسے شاندار اسپنرز موجود تھے جس کی کمی محسوس ہورہی ہے۔
