ٹاپ اینڈ ٹی 20 سیریز میں پاکستان شاہینز کی مسلسل تیسری کامیابی

دورہ آسٹریلیا میں ٹاپ اینڈ ٹی 20 سیریز کھیلنے والے پاکستان شاہینز نے اپنی فتوحات کا سلسلہ جاری رکھتے ہوئے مسلسل تیسری بار کامیابی حاصل کرلی۔ 
پاکستانی بلے باز شاویز عرفان کی جارحانہ نصف سنچری اور نپی تلی باؤلنگ کی بدولت پاکستان شاہینز نے بدھ کی شام ڈارون کے ٹی آئی او اسٹیڈیم میں میلبورن اسٹارز کو 43 رنز سے شکست دے دی۔ ٹاپ اینڈ ٹی 20 سیریز میں شاہینز کی یہ مسلسل تیسری جیت تھی۔ 
پاکستان شاہینزنے پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 169 رنز بنائے۔ شاویزعرفان اور کپتان روحیل نذیر نے دوسری وکٹ کے لیے 50 رنز جوڑے۔ شاویز نے آؤٹ ہونے سے پہلے 37 گیندوں پر پانچ چوکوں اور چار چھکوں کی مدد سے 65 رنز بنائے۔
میلبورن اسٹارز کی جانب سے ارجن نائر اور ریلی مارک نے دو دو وکٹیں حاصل کی۔ جواب میں، میلبورن اسٹارز کے بلے بازوں کو پاکستانی بولرز نے ابتدا سے ہی دباؤ میں رکھا اور حریف ٹیم کو 17.1 اوورز میں 8 وکٹوں کے نقصان پر 126 رنز سے آگے نہ بڑھنے دیا۔ میلبورن اسٹارز کے کیم میک کلور اور کیمبل کیلا وے انجری کی وجہ سے بیٹنگ نہیں کرسکے۔ 
پاکستان شاہینز کی جانب سے بائیں ہاتھ کے اسپنر فیصل اکرم نے 24 رنز کے عوض دو وکٹیں حاصل کیں۔عالیان محمود، عرفات منہاس اور سجاد علی نے ایک ایک وکٹ حاصل کی۔ 
ڈی ایکس سی ایرینا میں اپنے آخری راؤنڈ کے میچ میں جمعہ کو شاہینز کا مقابلہ پی این جی سے ہوگا۔ میچ کی پہلی گیند مقامی وقت کے مطابق 6 بجے کرائی جائے گی۔ ٹورنامنٹ کا فائنل دو ٹاپ ٹیموں کے درمیان اتوار 6 اگست کو مقامی وقت کے مطابق 3 بجے کھیلا جائے گا۔