پاکستان کے سابق اسپیڈ اسٹار شعیب اختر نے اپنی ٹوئٹ میں محمد شامی کی متنازع ٹوئٹ پر کمنٹیٹر ہرشا بھوگلے کے کمنٹس دکھائے اور بھارتی کرکٹر سے پوچھا کہ اس مناسب ٹوئٹ کو آپ کیا کہتے ہیں؟
١٤ نومبر ٢٠٢٢
ٹی ٹوئنٹی ورلڈکپ کے فائنل میں شکست کے بعد سابق کرکٹر شعیب اختر نے اپنے ٹوئٹر اکاؤنٹ پر ٹوٹے ہوئے دل کا ایموجی بناکر ٹیم کی ہار پر دکھ کا اظہار کیا۔ شعیب اختر کا کہنا تھا کہ شکست پرافسردہ ہوں لیکن کوئی بات نہیں بھارت میں ورلڈ کپ اٹھائیں گے۔
بھارتی کرکٹر محمد شامی نے شعیب اختر کی ٹوئٹ کے جواب میں اسپورٹس مین اسپرٹ کا مظاہرہ نہ کرتے ہوئے ایک متنازع ٹوئٹ کی جس پر انہیں تنقید کا سامنا ہے۔
محمد شامی نے شعیب اختر کی ٹوئٹ کو ری ٹوئٹ کرتے ہوئے لکھا کہ سوری برادر اسے ’کرما‘ کہتے ہیں۔
شعیب اختر نے محمد شامی کی متنازع ٹوئٹ پر انہیں جواب دیتے ہوئے بھارتی کمنٹیٹر ہرشا بھوگلے کے کمنٹس دکھائے اور پوچھا کہ اس مناسب ٹوئٹ کو آپ کیا کہتے ہیں؟اپنی ٹوئٹ میں ہرشا بھوگلے نے 137 کے ٹوٹل کا شاندار طریقے سے دفاع کرنے پر پاکستانی بولنگ لائن کی تعریف کی تھی۔
اس سے قبل سابق فاسٹ بالر شعیب اختر نے ٹی 20 ورلڈ کپ فائنل میں انگلینڈ کے ہاتھوں پاکستان کی شکست پر کہا کہ قومی کرکٹ ٹیم کی بولنگ پورے ایونٹ میں بہترین رہی اور شکست پر ہم سب افسردہ ہیں لیکن ہم اپنے کھلاڑیوں کے ساتھ کھڑے ہیں۔
اپنے ویڈیو پیغام میں انہوں نے کہا کہ پاکستان ٹی 20 ورلڈ کپ ہار گیا لیکن قومی کھلاڑیوں نے بہترین کارکردگی کا مظاہرہ کیا، ایونٹ کے آخری میچ میں فاسٹ بالر شاہین شاہ کا ان فٹ ہونا ٹرنینگ پوائنٹ تھا لیکن کوئی بات نہیں، ہمیں مایوس نہیں ہونا۔
شعیب اختر نے انگلینڈ کے کھلاڑی بین اسٹوکس کا حوالہ دیتے ہوئے کہا کہ 2016 کے ورلڈ کپ میں 5 چھکے کھا کر وہ ٹیم کی ناکامی کا باعث بنے تھے لیکن آج انہوں نے ورلڈ کپ میں اپنی ٹیم کو کامیابی دلائی ہے۔
انہوں نے قومی ٹیم کے کھلاڑیوں کو مخاطب کرکے کہا کہ ’میں آپ کے ساتھ کھڑا ہوں جس طرح پوری قوم آپ کے شانہ بشانہ ہے، ہم بھارت میں ورلڈ کپ اٹھائیں گے۔
.jpg)
