شعیب ملک اور ثانیہ مرزا کی علیحدگی کی افواہیں ایک بار پھر گرم

پاکستانی کرکٹ ٹیم کے سابق کپتان اور مایہ ناز آل رائونڈرشعیب ملک کے سوشل میڈیا پروفائل سے اپنی اہلیہ ثانیہ مرزا کا حوالہ ہٹائے جانے پر ایک بار پھر دونوں کی علیحدگی کی خبریں گردش میں ہیں۔ 
پچھلے کچھ ماہ کے دوران شعیب ملک اور ثانیہ مرزا کی علیحدگی کے حوالے سے کئی افواہیں میڈیا پر گردش کرتی دکھائی دی ہیں تاہم ابھی تک اسٹار جوڑی کی جانب سے ان افواہوں کی کوئی تردید یا تصدیق نہیں کی گئی بعد ازاں جوڑی کو ایک شو کی میزبانی کرتے بھی دیکھا گیا۔
تاہم اب شعیب ملک کی جانب سے انسٹاگرام بائیو میں ردو بدل نے ایک بار پھر پاکستانی اور بھارتی اسٹارزکی جوڑی کے درمیان دوریوں کی خبروں کو ہوا دے دی ہے۔ 
قومی کرکٹر نے اپنی بائیو سے ثانیہ مرزا کو کیا گیا ٹیگ ’ہسبینڈ ٹو سپر ویمن ‘ ہٹادیا ہے، شعیب کی انسٹا بائیو میں اس ٹیگ کی جگہ اب Live Unbroken نے لے لی ہے، واضح رہے کہ ’ Live Unbroken ‘ امریکی مصنفہ تریسیا مائلز کی ایک مشہور کتاب ہے، جس کا موضوع طلاق کے بعد خود کو سنبھالنے اور ثابت قدم رہنے کے حوالے سے ہے۔ 
دوسری جانب شعیب ملک کی بائیو میں پہلے ’ایتھلیٹ‘ درج تھا جس کی جگہ اب ’پرو ایتھلیٹ‘ نے لے لی ہے تاہم بیٹے کو نعمت قرار دینے کا بیان شعیب ملک کی بائیو میں تاحال موجود ہے۔
بھارت کی سابق ٹینس اسٹار ثانیہ مرزا اور پاکستانی کرکٹر شعیب ملک 2010 میں رشتہ ازدواج میں منسلک ہوئے تھے اور ان کا ایک بیٹا اذہان ملک مرزا ہے۔