news
English

شعیب، ثناء کی شادی کےبعد سعیدہ امتیازکا پاکستانی مردسے شادی نہ کرنےکااعلان  

شعیب ملک اور ثناء جاوید کی شادی کی خبر 20 جنوری کو اچانک سامنے آئی تھی۔

شعیب، ثناء کی شادی کےبعد سعیدہ امتیازکا پاکستانی مردسے شادی نہ کرنےکااعلان  

پاکستانی شوبز کی معروف ماڈل اور اداکارہ سعیدہ امتیاز نے قومی ٹیم کے سابق کپتان شعیب ملک اور ثناء جاوید کی شادی کے بعد اعلان کیا ہے کہ وہ کسی پاکستانی مرد سے شادی نہیں کریں گی۔ 
20 جنوری کو اچانک شعیب ملک اور ثناء جاوید کی شادی کی خبر سامنے آئی تو مداحوں سے لے کر شوبز انڈسٹری اور دنیائے کرکٹ تک ہر ایک فنکار اور کھلاڑی حیران نظر آیا کیونکہ اس جوڑی نے اچانک اپنی شادی کا اعلان کیا اور یہاں قابلِ ذکر بات یہ ہے کہ اس جوڑی کی یہ پہلی نہیں بلکہ دوسری شادی ہے۔ 
اس شادی کے بعد جہاں شوبز ستاروں نے شعیب ملک اور ثناء جاوید کو مبارکباد دی تو وہیں کچھ فنکاروں نے اس جوڑی پر تنقید بھی کی جن میں معروف ماڈل اور اداکارہ سعیدہ امتیاز بھی شامل ہیں۔ 
سعیدہ امتیاز نے اپنے آفیشل انسٹاگرام اکائونٹ پر ایک اسٹوری میں تحریری نوٹ لکھا، جس میں اُنہوں نے کہا کہ “پاکستان کے حالات دیکھنے کے بعد مجھے نہیں لگتا کہ میں کسی پاکستانی مرد سے شادی کرنا چاہوں گی”۔ 
اداکارہ نے کہا کہ “میں اپنے لیے جیون ساتھی پاکستان کے بجائے کسی دوسرے ملک سے ڈھونڈ لوں گی کیونکہ جیسے یہاں ہر دوسال کے بعد وزیراعظم تبدیل کیا جاتا ہے، اُسی طرح شادی کے کچھ سالوں بعد بیویاں تبدیل کی جاتی ہیں”۔  
یاد رہے کہ اپنے کام سے جلد ہی شوبز انڈسٹری میں نام بنانے والی سعیدہ امتیاز کی پیدائش متحدہ عرب امارات میں ہوئی اور وہ یو اے ای اور امریکا میں پلی بڑھیں جبکہ اداکاری اور ماڈلنگ کا شوق انہیں پاکستان لے آیا۔ 
سعیدہ امتیاز نے فلم ’قلفی، ’ریڈرم، ’تھوڑی سیٹنگ تھوڑا پیار، ’وجود اور فلم ’کپتان‘ میں اداکاری کے جوہر دکھائے، عمران خان پر بننے والی فلم ’کپتان‘ میں سعیدہ امتیاز نے ان کی سابق اہلیہ جمائما کا کردار ادا کیا تھا۔  
واضح رہے کہ ثناء جاوید نے سال 2020 میں گلوکار عمیر جسوال سے پہلی شادی کی تھی، اس جوڑی نے اپنے نکاح کی تصاویر انسٹاگرام اکاؤنٹ پر پوسٹ کی تھیں اور سال 2023 کے آخر میں اس جوڑی کی طلاق کی خبر سامنے آئی تھی۔  
دوسری جانب پاکستانی کرکٹر شعیب ملک نے سال 2010 میں بھارتی ٹینس اسٹار ثانیہ مرزا سے پہلی شادی کی تھی، دونوں کا ایک بیٹا اذہان مرزا ملک ہے جس کی پیدائش 2018 میں ہوئی تھی۔