اپنے195رنز کے ہدف کا دفاع کرتے ہوئے، پروٹیز کی قیادت کاگیسو ربادا نے کی، جنہوں نے اپنے چار اوورز کے اسپیل میں 3/18 کے اعدادوشمار کے ساتھ شاندار کارکردگی کا مظاہرہ کیا۔
٢٠ جون ٢٠٢٤
آئی سی سی ٹی 20 ورلڈ کپ 2024 کےسپر 8 مرحلے کے پہلے میچ میں جنوبی افریقہ نے امریکی ٹیم کو 18 رنز سے شکست دے دی۔
سر ویون رچرڈز اسٹیڈیم اینٹیگوا میں گروپ ٹو کی ٹیموں کے درمیان کھیلے گئے میچ میں جنوبی افریقہ نے امریکا کو جیت کے لئے 195 رنز کا ہدف دیا تھا جس کے جواب میں امریکی ٹیم 20 اوورز میں 6 وکٹوں کے نقصان پر 176 رنز بناسکی۔
امریکا کی طرف سے اینڈریس غوث نے شاندار بیٹنگ کرتے ہوئے 47 گیندوں پر پانچ چھکوں اور پانچ چوکوں کی مدد سے 80 رنز بنائے اور ناٹ آؤٹ رہے۔ ہرمیت سنگھ 38اوراسٹیون ٹیلر 24 رنز کے ساتھ نمایاں رہے۔ نتیش کمار8، کورے اینڈرسن 12اور شایان جہانگیر 3 رنز بناسکے جبکہ ایرون جونز صفر پر پویلین لوٹ گئے، جسدیپ سنگھ 2 رنز بناکر ناٹ آؤٹ رہے۔
جنوبی افریقہ کی طرف سے کاگیسو ربادا نے 3 شکار کیے، انہوں نے اپنے چار اوورز کے اسپیل میں 3/18 کےاعدادوشمار کے ساتھ شاندار کارکردگی کا مظاہرہ کیا، تبریز شمسی، کیشو مہاراج اور انرچ نورجے نے ایک، ایک وکٹ حاصل کی۔
قبل ازیں امریکا نے ٹاس جیت کر فیلڈنگ کا فیصلہ کیا تھا، جنوبی افریقہ نے پہلے بیٹنگ کرتے ہوئے 20 اوورز میں 4 وکٹوں کے نقصان پر 194 رنز بنائے۔
امریکا کیخلاف جنوبی افریقا کی اننگز کا آغاز کوئنٹن ڈی کوک اور ریز ہینڈرکس نے کیا۔ جنوبی افریقہ کو 16 رنز کے مجموعی اسکور پر پہلا نقصان اٹھانا پڑا جب ریز ہینڈرکس 11 رنز بناکر پویلین لوٹ گئے۔ کوئنٹن ڈی کوک 74 رنز اور ایڈن مارکرم 46 رنز بناکر آوٹ ہوئے جبکہ ڈیوڈ ملر صفر پر ہی چلتے بنے، ہینرچ کلاسن 36 اور ٹرسٹن اسٹبز 20 رنز کے ساتھ ناٹ آؤٹ رہے۔
امریکا کی طرف سے سوربن نیتراولکر اور ہرمیت سنگھ نے 2، 2 وکٹیں حاصل کیں۔
