ٹی20 ورلڈکپ: آسٹریلیا سے شکست کے بعد افغان ٹیم میگا ایونٹ سے باہر

ایڈیلیڈ میں کھیلے گئے میچ میں افغانستان کے کپتان محمد نبی نے ٹاس جیت کر پہلے فیلڈنگ کرنے کا فیصلہ کیا، پہلے بیٹنگ کرتے ہوئے آسٹریلوی ٹیم نے مقررہ 20 اوورز میں 8 وکٹوں کے نقصان پر 168رنز اسکور کیے، گلین میکس ویل 32 گیندوں پر 54 رنز بناکر ناقابل شکست رہے۔

دیگر کھلاڑیوں میں اوپنر ڈیوڈ وارنر 25، کیمرون گرین 3، مچل مارش 45، اسٹیون سمتھ 4، مارکس اسٹوئنس 25، کپتان میتھیو ویڈ 6، پیٹ کمنز صفر جبکہ کین رچرڈسن صرف ایک رن بناسکے۔

افغانستان کی جانب سے نوین الحق نے 3، فضل الحق فاروقی 2 جبکہ راشد خان اور مجیب الرحمان نے ایک ایک وکٹ حاصل کی۔

ہدف کے تعاقب میں افغان اوپنر عثمان غنی جلد وکٹ گنوا بیٹھے، انہوں نے 2 رنز بنائے، رحمان اللہ گرباز 30 رنز بنانے میں کامیاب ہوئے۔ ابراہیم زردان اور گلبدین نائب نے تیسری وکٹ کی شراکت میں 59 رنز کی پارٹنرشپ قائم کی تاہم گلبدین 99 کے مجموعی اسکور پر آؤٹ ہوگئے، جس کے بعد افغان ٹیم کے 3 کھلاڑی محض 4 رنز کا اضافہ کرکے پویلین لوٹ گئے۔

میچ کے اختتامی لمحات میں اسپنر راشد خان نے جارحانہ کھیل کا مظاہرہ کرتے ہوئے 23 گیندوں پر 4 چھکوں اور 3 چوکوں کی مدد سے 48 رنز کی زبردست اننگز کھیلی تاہم وہ ٹیم کو فتح سے ہمکنار نہ کروا سکے۔

ابراہیم زردان 36، گلبدین نائب 39، کپتان محمد نبی ایک اور نجیب اللہ صفر پر آسٹریلوی بالرز کا شکار بنے۔ آسٹریلیا کی جانب سے ایڈم زمپا اور جوش ہیزل ووڈ نے 2،2 جبکہ کین رچرڈسن نے ایک وکٹ حاصل کی۔

واضح رہے کہ گروپ اے میں ٹاپ 2 ٹیموں کا فیصلہ کل انگلینڈ اور سری لنکا کے میچ کے بعد ہوگا، اگر انگلینڈ لنکن ٹائیگرز کو شکست دیتا ہے تو بہتر رن ریٹ کی وجہ سے سیمی فائنل میں جگہ بنالے گا جبکہ شکست کی صورت میں بھی آسٹریلیا سیمی فائنل کے لئے کوالیفائی کرلے گا۔