پاکستان کرکٹ ٹیم کے فاسٹ بولر شاہین شاہ آفریدی کا کہنا ہے کہ مجھے تنقید کی فکر نہیں بلکہ میں تنقید کرنے والوں کو بھی جیت کی مبارکباد دیتا ہوں۔
١٠ نومبر ٢٠٢٢
قومی ٹیم کے فاسٹ بولر شاہین آفریدی کا کہنا ہے کہ ٹی ٹوئنٹی ورلڈکپ کے فائنل میں انشااللہ جیت پاکستان کا مقدر بنے گی۔
سڈنی سے میلبرن روانگی سے قبل میڈیا سے گفتگو کرتے ہوئے شاہین شاہ آفریدی نے کہا کہ بھارت اور انگلینڈ دونوں اچھی کرکٹ کھیل کر سیمی فائنل میں پہنچے ہیں، فائنل میں جو بھی مدمقابل ہو امید ہے فائنل ہم جیتیں گے۔
انہوں نے کہا کہ انہیں تنقید کرنے والوں کی فکر نہیں، وہ ٹی وی پر بیٹھتے ہیں ان کی جاب ہے، انہیں مبارکباد دوں گا اور کہوں گا کہ وہ جیت کے اس لمحے کو انجوائے کریں۔
شاہین آفریدی کا کہنا تھا انہیں یقین تھا کہ ایک چانس ملے گا، اچھی کرکٹ کھیلنے کے باوجود شکستوں کا سامنا رہا کیونکہ رزلٹ ہمارے ہاتھ میں نہیں ہوتے، جیت پر پوری قوم کو مبارکباد دوں گا۔
قومی کرکٹر نے مزید کہا کہ جیت کا کریڈٹ انہیں نہیں بلکہ تمام کھلاڑیوں کو جاتا ہے، ڈریسنگ روم میں کپتان، ہیڈ کوچ اور کھلاڑی کوالیفائی کرنے کےلیے پرامید تھے۔
ان کا کہنا تھا کہ گھٹنے کی انجری کے بعد فاسٹ بولر کا کم بیک کرنا آسان نہیں ہوتا، تین ماہ میں انجری کے بعد 100 فیصد پرفارمنس دے رہا ہوں، کرکٹ گیم ہے اور فائنل تک رسائی کا کریڈٹ پوری ٹیم کے سر ہے، فائنل میں بھارت یا انگلینڈ سے جیت پاکستان کا مقدر بنے گی۔
.jpg)
