ٹی20 ورلڈکپ: کیویز کے ہاتھوں شکست کے بعد آئرلینڈ کی ٹیم ٹورنامنٹ سے باہر

ایڈیلیڈ میں کھیلے گئے میچ میں آئرلینڈ کے کپتان اینڈریو بالبرنی نے ٹاس جیت کر پہلے فیلڈنگ کرنے کا فیصلہ کیا، کیویز نے پہلے کھیلتے ہوئے جارحانہ کھیل کا مظاہرہ کیا اور مقررہ 20 اوورز میں 6 وکٹوں کے نقصان پر 185 رنز اسکور کیے۔

نیوزی لینڈ کی جانب سے اوپنر فن ایلن 32، ڈیون کونوے 28، گلین فلپس 17، ڈیرل مچل نے 31 رنز بنائے جبکہ جمی نیشم اور مچل سیٹنر بغیر کوئی رن بنائے پویلین لوٹے، کپتان کین ولیمسن نے جارحانہ کھیل پیش کرتے ہوئے 35 گیندوں پر 61 رنز کی زبردست اننگز کھیلی۔

آئرلینڈ کی جانب سے جوش لٹل نے 3 گیرتھ ڈیلانی نے 2 جبکہ مارک ایڈیر نے ایک وکٹ حاصل کی۔

ہدف کے تعاقب میں آئرلینڈ نے محتاط آغاز کیا تاہم کپتان اینڈی بالبرنی 30 رنز بناکر وکٹ گنوابیٹھے، اوپنر پال اسٹرلنگ 33 رنز کے ہمراہ نمایاں رہے۔ دیگر کھلاڑیوں میں لورکن ٹکر 13، ہیری ٹییکٹر 2، گیرتھ ڈیلانی 10، کرٹس کیمفر 7 رنز بناسکے۔ میچ کے اختتامی لمحات میں جارج ڈوکریل نے 23 رنز کی اننگز کھیلی جو رائیگاں گئی۔

آئرش ٹیم مقررہ 20 اوورز میں 9 وکٹوں کے نقصان پرصرف 150 رنز بناسکی، نیوزی لینڈ کی جانب سے ایش سودھی، مچل سینٹنر اور لوکی فرگوسن نے 2،2 جبکہ ٹم ساؤتھی نے ایک وکٹ حاصل کی۔