ٹی 20 ورلڈکپ: پاکستان سیمی فائنل میں نیوزی لینڈکو شکست دے کر فائنل میں پہنچ گیا

جوائن واٹس ایپ چینل

سڈنی میں کھیلے گئے سنسنی خیز میچ میں پاکستان نے نیوزی لینڈ کو پہلے سیمی فائنل میں 7 وکٹوں سے شکست دے کر ٹی20 ورلڈکپ 2022 کے فائنل کیلیے کوالیفائی کرلیا۔

سڈنی کے تاریخی گرائونڈ میں کھیلے گئے میچ میں نیوزی لینڈ کے کپتان کین ولیمسن نے ٹاس جیت کر پہلے بیٹنگ کرنے کا فیصلہ کیا، پہلے بیٹنگ کرتے ہوئے کیوی ٹیم نے مقررہ 20 اوورز میں 4 وکٹوں کے نقصان پر 152 رنز اسکور کیے، ہدف کے تعاقب میں قومی ٹیم کے کپتان بابراعظم اور محمد رضوان نے جارحانہ کھیل پیش کرتے ہوئے 105 رنز کی اوپننگ پارٹنرشپ قائم کی، جس نے فتح کی بنیاد رکھی۔

پاکستان کی جانب سے کپتان بابراعظم نے 42 گیندوں پر 7 چوکوں کی مدد سے 53 رنز کی شاندار اننگز کھیلی جبکہ محمد رضوان نے 57 رنز اسکور کیے، نوجوان بیٹر محمد حارث 30 رنز بناکر نمایاں رہے۔

نیوزی لینڈ کا کوئی بھی بالر خاطر خواہ کارکردگی دکھانے میں ناکام رہا، ٹرینٹ بولٹ 2 جبکہ مچل سینٹنر ایک وکٹ حاصل کرسکے۔

قبل ازیں کپتان کین ولیمسن نے 46 اور ڈیرل مچل 53 کی اننگز کی بدولت کیویز نے پاکستان کو جیت کے لئے 153 رنز کا ہدف دیا تھا، نیوزی لینڈ کے دیگر کھلاڑیوں میں فن ایلن 4، ڈیون کونوے 21، گلین فلپس 6، جیمز نیشم 14 رنز بناسکے تھے۔

پاکستان کی جانب سے شاہین شاہ آفریدی نے 2 جبکہ محمد نواز نے ایک وکٹ حاصل کی۔

قبل ازیں ٹی20 ورلڈکپ میں دونوں ٹیمیں 6 مرتبہ ایک دوسرے کے آمنے سامنے آئی ہیں، جس میں قومی ٹیم کا پلڑا بھاری رہا ہے۔ پاکستان نے حریف ٹیم کو 4 مرتبہ شکست دی ہے جبکہ کیویز 2 بار کامیابی سمیٹ چکے ہیں۔

پاکستان کا اسکواڈ:

کپتان بابراعظم، محمد رضوان، شان مسعود، افتخار احمد، محمد حارث محمد نواز، محمد وسیم جونیئر، شاداب خان، شاہین شاہ آفریدی، نسیم شاہ اور حارث رؤف

نیوزی لینڈ کا اسکواڈ:

کپتان کین ولیمسن، فن ایلن، ڈیون کونوے، گلین فلپس، ڈیرل مچل، جیمز نیشم، مچل سینٹنر، ٹم ساؤتھی، ایش سودھی، لوکی فرگوسن اور ٹرینٹ بولٹ

نٹرنیشنل کرکٹ کونسل (آئی سی سی) ایونٹ میں پاکستان کا نیوزی لینڈ کے خلاف شاندار ریکارڈ کا حامل ہے۔

ورلڈ کپ میں اب تک پاکستان اور نیوزی لینڈ کی ٹیمیں 6 بار مدمقابل آئی ہیں۔

ورلڈ کپ میں 6 میچز میں سے 4 میں پاکستان کو اور 2 میچز میں نیوزی لینڈ کو فتح حاصل ہوئی ہے۔

2007ء کے ٹی ٹوئنٹی ورلڈ کپ کے پہلے سیمی فائنل میں پاکستان نے نیوزی لینڈ کو 6 وکٹوں سے شکست دی تھی۔

 92 کے ورلڈ کپ میں بھی پاکستان نے سیمی فائنل میں نیوزی لینڈ کو ہرا کر فائنل کھیلا اور فتح حاصل کی۔

اس کے علاوہ پاکستان اور نیوزی لینڈ کے درمیان اب تک 28 ٹی ٹوئنٹی میچز کھیلے جاچکے ہیں جن میں پاکستان کا ریکارڈ نیوزی لینڈ سے کافی بہتر ہے۔

پاکستان نے نیوزی لینڈ کے خلاف 17 میچ جیتے جبکہ 11 میں گرین شرٹس کو شکست ہوئی۔

 ٹی20 ورلڈ کپ کا بھارت اور انگلینڈ کے درمیان سیمی فائنل جمعرات کو ایڈیلیڈ میں شیڈول ہے۔

سیمی فائنل میں کامیاب ہونے والی ٹیمیں ٹی ٹوئنٹی ورلڈ کپ کا فائنل اتوار کو میلبرن کے تاریخی گرائونڈ میں کھیلیں گی۔