ٹی20 ورلڈکپ: جنوبی افریقہ کے ہاتھوں بنگلہ دیش کو عبرتناک شکست

سڈنی میں کھیلے گئے میچ میں جنوبی افریقہ نے ٹاس جیت کر پہلے بیٹنگ کرنے کا فیصلہ کیا جو درست ثابت ہوا، پروٹیز نے مقررہ 20 اوورز میں 5 وکٹوں کے نقصان پر 205 رنز اسکور کیے تھے۔

جنوبی افریقی کپتان ٹیمبا بووما محض 2 رن بناکر وکٹ گنوا بیٹھے تاہم کوئنٹن ڈی کاک اور ریلی روسو نے جارحانہ کھیل کا مظاہرہ کیا اور دوسری وکٹ پر 163 رنز کی زبردست پارٹنرشپ قائم کی، ڈی کوک 38 گیندوں پر 67 رنز بناکر پویلین لوٹے جبکہ روسو نے ایونٹ کی پہلی سینچری اسکور کی، ان کی اننگز میں 7 چوکے اور 8 چھکے شامل تھے۔

دیگر بیٹرز میں ٹرسٹن اسٹبس 7، ایڈن مارکرم 10 رنز بناکر نمایاں رہے، بنگلہ دیش کی جانب سے کپتان شکیب الحسن نے 2 جبکہ تسکین احمد، حسن محمود اور عفیف حسین نے ایک، ایک وکٹ حاصل کی تھی۔

ہدف کے تعاقب میں بنگال ٹائیگرز کا آغاز مایوس کن رہا اور پوری ٹیم محض 17 ویں اوور میں 101 رنز بناکر آل آؤٹ ہوگئی۔ بنگلہ دیش کے لئے اننگز کا آغاز کرتے ہوئے اوپنر نجم الحسن نے 9 اور سومیا سرکارنے 15 رنز بنائے۔ کپتان شکیب الحسن اور عفیف حسین ایک ایک، مہدی حسن میراز 11 اور نور الحسن 2 رنز بناکر نمایاں رہے۔

بنگلہ دیش کی جانب سے لٹن داس واحد بلے باز تھے جنہوں نے 30 سے زائد رنز اسکور کیے۔ پروٹیز کی جانب سے اینریچ نورٹجے 4، تبریز شمسی 2 جبکہ کیشو مہاراج ایک وکٹ حاصل کرسکے۔